Rojnamegere Zeynep Durguta ke hetê keyeyê kesê fuhuşkerî ra yena tehdîtkerdene ard ziwan ke rojnamegerî rewşa pûçbîyaye û raştîyan vejenê werte coka timî benê hedef.
Muxabîra Ajansê Mezopotamya (MA) Zeynep Durgute Şirnex de ‘Çeteya Fuhuşî’ îfşa kerdibî. Keyeyê Kenan Tataro ke dosya de kerdox o, Zeynep Durgute tehdît keno. Zeynepe derheqê babete de ANF’rê rê qisey kerd.
Zeynepe da zanayene ke ê sey rojnamegeran xeta Apê Musa û Gurbetellîyan de raştîyan eşkera kenê û pawenê. Zeynepe vat: “Vera raştîyan tim hêrsêk est o. Raştîyî tayê kesan aciz keno. Seba ney rojnamegerî tepişîyenê û tehdît benê. Rixmê heqdarîya xo zî ma yenê muhakemekerdene û cezakerdene. Eke welatêk de azadîya çapemenîye çin ba tedaya vera azadîya fikran zaf bena.
Vera xebatkaranê çapemenîya azade teda û gefî zaf ê. Mehkemeyî zî nînan asteng nêkenê. Mehkemeyî goreyê rewşa sîyasîye têgêrenê.”
Zeynepe bale ante girîngîya paştdayîşî ser û vat: “Vera teda, gef, destbendkerdiş, tepiştiş û sansûrî ganî têkoşîn yew bibo. Ganî ma hîna zaf xeberan virazê, rêxistinîya xo aver berê. Seba rojnamegeran her ca ganî bibo warê têkoşînî. Ganî ma her zere hem zî teber de paştdayîşê xo xurtêr bikerê.
Rojnamegerî ganî ney bizanê ke ma nêbê çew do ma nêpawo. Çunke karê ma karêko winayên o ke her kesî aciz keno. Coka ganî seba nê têkoşînî waştiş û qerardarî est bê.”
