Endama Konseya Serekîya Pêroyî ya KCK’yî Zîlar Stêrk derheqê prosesî de cewab da persanê ajansê ma û vat proses bi azadîya fîzîkî ya Rayberê Şarê Kurdî Abdullah Ocalanî rindêr beno û ganî komîsyon bi lez Ocalanî goşdarî bikero. Zîlar Stêrk vat komîsyon seba naskerdişê ziwan û nasnameyê şarê kurdî zî ganî zemînê huqûqî û qanûnî amade bikero.
Prosesê “Aştî û Komelê Demokratîkî” ke Rayberê Şarê Kurdî Abdullah Ocalanî 27ê sibate de da destpêkerdene, bi averşîyayîş û munaqeşeyan dewam keno. Badê vengdayîşê Abdullah Ocalanî, PKK’yî 5 û 7ê gulane de kongreya xo ya 12. viraşte û qerarê xofesîxkerdişî da. Vengdayîşê Abdullah Ocalanî ser o grûbêka gerîlayanê bi nameyê “Grûba Aştî û Komelê Demokratîkî” bi serekîya Hemsereka Koma Komelanê Kurdîstanî (KCK) Besê Hozat 11ê temmuze de Eşkefta Casenê ya qezaya Dukanî ya Silêmanê de kom bîyî, bi merasîmêk çekê xo îmha kerdî. Badê îmhakerdişê çekan binê banê Meclîsê Tirkîya de “Komîsyonê Demokrasî, Wayûbirayî û Piştîdayîşê Mîllî” ame awankerdene.
Her çend komîsyon xebatan bikera zî hema zî gamêka şênbere nêeşta û hema zî şert û mercanê Abdullah Ocalanî de bedilîyayîşêk nêbîyo ke bi hewayêko fîzîkî beşdarê prosesî bibo. Reyna seba ke waştişê şarê kurdî bêrê qebulkerdene, bingeyêko huqûqî û entegrasyono demokratîk nêameyo awankerdene.
Tewr zaf gerîla û KCK ke bi gamanê stratejîkan nêzdîyê prosesî bîyê û Abdullah Ocalan sey sermuzakerekerdox û îradeyê çareserî vînenê, nêzdî ra rewşe û hedîseyanê derheqê prosesî de taqîb kenê.
Endama Konseya Serekîya Pêroyî ya KCK’yî Zilar Stêrk roportajê xo yo taybet de cewab da persanê Ajansê Welatî.
‘Ma Serok Apo sey muzakerekerdoxo sereke vînenê’
Zîlar Stêrk wina vat: “Badê 6 serran reya ewile avûkatî şîyî Gîrawa Îmralî û pêvînayîş kerd. Serok Apo avûkatan reyde silamî erşawitî. Ma zî silamanê ey gênê xo ser o û silam û heskerdişê xo ey rê erşawenê.
Proseso ke bi înîsyatîfê Serok Apo dest pêkerd, prosesêko rêze ra nîyo. Prosesêko muhîm û tarîxî yo. Çareserîya meseleyê kurdan a seserre gêno xo dest. Ma Serok Apo sey muzakerekerdoxê xo yê sereke vînenê. Nêzdîbîyayîşê vera Serok Apo zî ganî wina bibo.
27ê sibate de înîsyatîf girewt û veng da ke têkoşînê 50 serran ê çekdarî biqedîyo û PKK xo fesîx bikera. Ma zî sey Têgêrayîşê Azadîya Kurdîstanî cewabêko pozîtîf da û kongreya PKK’yî ya 12. viraşte û çarçewaya vengdayîşî de hîrê qerarê bingeyînî girewtî. Qerarê ma yo yewin qedînayîşê stratejîyê têkoşînê çekdarî bî. Yo dîyin fesîxkerdişê PKK’yî bi. Qerarê ma yo hîrêyin zî seba nê her di qeraranê stratejîkî qerarêko bingeyîn o. Ma bi hewayêko hîra girewt dest ke azadîya fîzîkî ya Serok Apo ganî bêra ca. Yanî heta azadîya fîzîkî ya Serok Apo nêra ca, pratîkkerdişê nê qeraran mumkun nîyo.
‘Canêardişê heqê hêvî, binpaykerdişê heqanê merdimîye yo’
2014î ra nat qerarê Mehkemaya Heqanê Merdiman a Ewropa est o. Cezaya muebbedo giran bêro wedaritene û ‘heqê hêvî’ bêro caardene. 11 serrî vîyartî labelê dewleta tirke qanûn û huqûqê xo de vurîyayîş nêkerd. Caardişê heqê hêvî ma sey rewşêka awarte nêvînenê, hetê heqanê merdim û huqûqî ra no şert o. Ganî dewleta tirke huqûqê xo de ca bida nê heqî. Ewro binpaykerdişê qerarî pozîsyonê sûcî de yo. Ganî no sûc bêro wedaritene. Komîsyon ganî Serok Apo goşdar bikero
‘Ganî komîsyın Serok Apoyî goşdarî bikero’
Komîsyon hetê hukmete de îdare beno. Komîsyon ganî berpirsîyarîya xo ya bingeyîne bigîro xo ser. Rind o ke komîsyon beşanê komelî goşdarî keno labelê ya muhîme komîsyon ganî muxatabo bingeyîn Serok Apo ke 50 serrî yo serekîya nê têgêrayîşî keno, goşdar bikero. Devlet Bahçelî bi xo veng da û vat wa Serok Apo bêro kursîya DEM Partî ya Meclîsî de qisey bikero. Wa Serok Apo berê Meclîsî û uca de qisey bikerê ke mesele û çareserîye bimojno înan.
‘Astengkerdişê Kurdkî şerm o’
Astengkerdişê kurdkî şerm û rûreşîye yo. Komîsyonî destûr nêda Dayîkê Aştî derdê xo bi ziwanê xo vajê. Nêverda dayîkî dej û derdê zerrîya xo bi ziwanê xo îfade bikerê. Ziwanê înan qedexe kerd. Zilmê tewr girse no yo. Meseleyê kurdkî tam zî no yo. Dayîkê Aştî hetê mexdûranê meseleyî de yê ke ganî bêrê goşdarkerdene. Dayîkî muxatabê meseleyî yê, dej û elemê nê meseleyî dî. Zerrîya înan bi birîn a, bi gonî ya. Ganî bi ziwanê înan goşdarî bikerdênê. Na bêhurmetîyêka girse ya. Ganî her kes komîsyon de bi hewayêko azad qisey bikero û xo îfade bikero. Cayo ke problemê ziwanê Kurdkî tede bêrê çareserkerdene û zemînê tewr musaît komîsyon o la no zemîn zî baş nêame şuxulnayene û ziwan yeno astengkerdene. La ganî DEM Partî hîna hişk reaksîyon bimojnayêne. Nê prosesî de problemê ziwanê dayîke, qedexeyê kultur, estbîyayîş û nasnameyê Kurdkî ser o bêro wedaritene. Eke nê problemî nêrê çareserkerdene û astengî û qedexeyî nêrê wedaritene gelo do no komîsyonê Meclîsî seba çi bixebitîyo. Eke komîsyon tena seba çekronayîşê gerîla bixebitîyo do şaşî bikero. Heta ke nê qedexeyî nêwirzî, gerîla do senî çekan rono. Nê semedî ra ganî no komîsyon zemînê huqûqî û qanûnî amade bikero ke nê qedexeyî ziwanê Kurdkî ser o wirzê.
‘Jin Jîyan Azadî tena vatişêk nîyo’
Verê ez cinîya serewedaritoxe Jîna Emînî û pêro cangorîyanê serewedaritişê ‘Jin Jîyan Azadî’ bi hurmet yad kena. Jin Jîyan Azadî tena vatişêk nîyo. Hişyarîyêka tarîxî, felsefîke û wayîrê manayêka xorîn o. Serewedaritişê ‘Jin Jîyan Azadî’ Rojhelatê Kurdîstanî de dest pêkerd û resna heme cayanê dinya. Ruh da pêro cinîyanê dinya. Belkî serewedaritişî hîrê serrî xo ra pey verdayê labelê ganî bizanê no tena sey destpêkê şorişî bi, hema nêqedîyayo.”
‘Çi derdê şima kurdanê Rojava reyde est o?’
Dişmenîya vera şarê kurdî nêqedîyaya. Nêzdîbîyayîşê rayedaranê Tirkîya ecêb o. Hem prosesê aştî de yê hem zî Rojava tehdît kenê. No yeno a mana ke prosesî de durist nîyê. Çi derdê şima Kurdanê Rojava reyde est o? Şima Kurdanê ke sînorê dewletêka bîne de ciwîyenê, çi wazenê? Verê meseleyê Vakurî çareser bikerê, Rojava zî meseleyê zereyî yê Sûrîya rê verda. Hukmatê AKP’yî nêverdano ke hukmatê Şamî Kurdanê Rojava reyde prosesê aver bero. Dewleta tirke astengîyêka girse vejena. Hukmatê Şamî yê Ahmed El-Şara bi îradeyêko xoser hereket nêkeno.”
