Bi hembarîya MED-DER, TJA û Şaredarîya Licêyî, dewa Comelaşê Licêyî de bi şîaranê ‘Ma vera şîdeta cinî û ziwanî de bêveng nêmanenî’ û ‘Gede pawitoxê ameyoxî yê ziwanî yê’ şayîyêk ame viraştene. Hemsereka MED-DER’î Şukran Yakut va ke ziwanê dayîke ser zilm, domanan de problemanê pedegojîkî aver beno.
Dewa Comelaşê Licêyî de bi şîaranê ‘Ma vera şîdeta cinî û ziwanî de bêveng nêmanenî’ û ‘Gede pawitoxê ameyoxî yê ziwanî yê’ şayîyêk ame viraştene. Şayî bi hembarîya MED-DER, TJA û Şaredarîya Licêyî virazîya. Şayî de cinî û gedeyan ameyî pêser.
Şayî ra Hemsereka MED-DER’î Şukrat Yakut, Hemşaredara Licêyî Dîlek Dîyar Ozer, Aktîvîsta TJA’yî Bahar Peker û bi desan dewijî beşdar bîyê.
‘Problemêko pedagojik o’
Şayî de Hemsereka MED-DER’î Şukran Yakut muhîmîya ziwanî ser o qisey kerd û wina va: “Ziwanê dayîke ser teda û zilm, domanan de problemanê pedegojîkî yê hîsî, perwerdeyî aver beno. No problem zî nesil bi nesil dewam keno.”
‘Meclîsê komunî zaf bi muhîm ê.’
Aktîvîsta TJA’yî Bahar Peker zî qiseyê xo de bal ant ser muhîmîya 25ê Teşrîna Peyêne ya Roja Têkoşînê Vera Şîdetê Cinîyan a Mîyanneteweyî rê û wina domna: “Çi heyf ke şero taybet xususî gede û cinîyan ser yeno averberdene. No proses de awankerdişê meclîsê komunan zaf bi muhîm o.”
Şayî de beşdaran rîyê gedeyan boyax kerdî, înan reyde kay kerdî. Gedeyî zî kêfweşîya xo ardî ziwan.
