Ziwanzan û Rayedarê MED-DER’î Suleyman Yilmaz va ke: “Ziwanê ma nasnamayê ma yo, yanî nika ra pey înkarkerdiş goreyê aqilî nîyo. Eke ziwan û nasname do qebûl bibê, xo ra meseleyê bînî zî bi rehetî hal benê.”
Tirkîya de bi serranê ke ser ziwanê Kurdkî teda û zilmî zêdîyenê. Seba ke Kurdkî ziwanê perwerdeyî û fermî nîyo her ke şono asîmîle beno. Sazî û dezgeyê demokratîke seba Kurdkî asîmîle nêbî xebatê xo domnenê.
Ziwanzan û Rayedarê MED-DER’î Suleyman Yilmaz ajansê ma rê rewşa ziwanî ser o qise kerd.
Ziwanzan û Rayedarê MED-DER’î Suleyman Yilmaz va ke seba xizmetê ziwanî yê Ajansê Welatî spasê xo kena û serkewtiş wazena.
Ma zaf ezîyet dîyê
Suleyman Yilmaz wina va: “Ziwan nasnameyê merdimî yo, merdim xo bi ziwanê xo înşa keno. Senî ke yeno dinya, der û dorê xo ra ziwanê maya xo bonder beno. Problemê ma ê xorîne, birîna xorîn a û wexto ke ma şonê dibistan sewbî ziwanî reyde perwerde vînenê. Ez zî zaf ezîyet dîya, ma talîmatan reyde ders dîynê; wardo, şo û bî yanî tirkî wina bonder bî.”
Yilmaz dîyar kerd ke tabî gedeyê kurdan heme dibistan ra hetanî zanîngehî na zehmetî ancenê, heta pedegojî û heta psîkolojî ra zorî ancenê û aşkera kerd ke yew mîllet esta û nameyê nê mîlletî zî kurd o, yew ziwanê înan zî esto û nameyê nê ziwanî zî kurdkî yo.
Ganî mîyanê şaran de cîyakerî çînî bo
Yilmaz tewro peynî bal ant ser bonderbîyayişê muhîmî yê zaravayê Kurdkî û wina qedîna: “Ganî ma hem kirmanckî hem zî kurmancî bizanê ke yewbînan ra fam bikê. Eke ma yewbînan ra fam nêkê, na rewşe zî xizmetê asîmîlasyonî do biko. Ma nika rewşa krîtîkî ra vîyarenê û ma wazenê na mesele bînî ra hal bibo. Şar û dewletê modernî meseleyê xo bi dîyalogî hal kenê û ma zî wazenê na mesele bi dîyalogî hal biba. No dem ganî mîyanê şaran de cîyakerî çînî bo, merdim merdim o, mîllet zî mîllet o. Ziwanê ma nasnamayê ma yo, yanî nika ra pey înkakerdiş goreyê aqilî nîyo. Eke ziwan, nasname qebûl bibê, xo ra meseleyê bînî zî bi rehetî hal benê.”
