Yeter û Leyla, Dêrsim de di cinîyê şanoger ê û nameyê şanoyê înan Budelayê Dêrsimî yo. Kamcîn dewe venga înan dana, şonê a dewe de kayê xo kay kenê. Vanê ke, “Zonê ma zonê Xizirî yo. Ma zonê xo de kay keme ke zon vîndî nêbo.”
Yeter Mor û Leyla Ataçe di cinîyê Dêrsimij ê û ziwanê dayîka xo de kayê şanoyî kay kenê. Rey rey ê terba çend camêrdan zî şanoyê xo kay kenê. Kamcîn dewe, kamcîn qeza û şaristan venga înan bido şonê uca de kayê xo kay kenê. Qîmetê ziwanê xo zanê û vanê, “Zonê ma zonê Xizirî yo û ma ganî zonê xo de qisey bikîme û kayanê xo kay bikîme ke zonê ma vîndî nêbo.”
‘Zonê ma zonê Xizirî yo’
Yeter Mor û Leyla Ataçe Ajansê ma rê qisey kerd. Yeter More vana ke: “Qomê ma tayê no zon xo vîr ra kerdo. Ma vanîme ke zonê ma zonê Xizirî yo. Sevetena naye ma nê karî de qomê xo ra vanîme ke, zonê xo qesey bikerê. Jîyar û dîyaranê ma ra raye kûta ci, raya xo ra mevêrê. Sarê ma verên de, eve lingan şîyêne nê jîyar û dîyaranê xo ser. Her cayî kenê xirabin. Sonê jîyaran serde simenê, kay û qilavetû kenê. Sarê ma yê verênî zon û kûltûrî ser çi kerdo, çutur hunerê xo viraşto, rayê ma çutur bîyo, ma ki sevetena nînan ra tîyatroyê xo virazîme.
Teyna zonî ser karê xo nêkeme, kultirê ma de çi ke est o ey ser o, sarê ma verên de se kerdo, înan ra ma rê çi mendo, ma înan bîyarîme têlewe jû ca, hatanû nika çutur ardê ma kî henî raye ra berime.”
‘Zon û kultir ma de barêde giran o’
Leyla Ataçe zî ziwanî û kayî ser o wina vana: “Pîlanê ma yê verenî jê de şîyê heqîya xo. Îyê ke mendê ey kî giran giran ûncînê sonê. Zon û kultirê ma de barêde girano. Cencû zon xo vîr ra kerdo. Ez û kûtêne zerê na tîyatroye ke ez jêde zonê xo qisey bikerî. Ma zonê xo de tîyatro kenîme. Zerê mi de ke çi est o mi waşt ke ez bikerî. Ez kewta mîyanê nê karê şanoyî mi qayt kerd ke mi zon xo vîr ra kerdo. Ez nika pê nê kayî hem kultirê xo hem kî zonê xo avêr bena.”
‘Qomê ma xo rê, her çîyê xo ra wayîr vejîyo’
Yeter More û Leyla Ataçe vatena xo ya peyêne vanê ke, ma wazenîme ke şarê ma welatê xo rê, zonê xo rê, jîyar û dîyaranê xo rê, îtîqatê xo rê wayîr vejîyo. Wayîr ke nêvejîyo destê ma de qe tawa nêmaneno.
