Nobeta sînor ku ji bo piştgiriya gelê Rojava di 13ê Kanûnê de li Nisêbînê hatiye destpêkirin, di roja 18an de berdewam dike. Parlamenterên DEM Partiyê Salîha Aydenîz beşdarî çalakiyê bû û got: “Ji bo li Rojhiata Navîn pêşketinek pêk bê divê di serî de statuya gelê Kurd nas bikin.”
Çalakiya nobetê ya li dijî êrişên dewleta tirk û koma wê ya paramîlîter SMOyê ên li ser Bakur û Rojhilatê Sûriyeyê li ser sînorê Nisêbîn a Mêrdînê û Qamişloyê hatiye destpêkirin di roja 18an de didome. Welatiyên di saetên serê sibehê de hatin cihê nobetê, dirûşmên “Bijî berxwedana Rojava” û “Bijî berxwedana gelê Kurd” berz kirin. Di çalakiyê de beşdaran pêşmalkên “Na ji şer re” li xwe kirin.
Parlamenterên DEM Partiyê û gelek kes li qada çalakiyê kom bun û daxuyanî dan. Parlamenterê DEM Partiyê Sînan Çiftyurek li ser sînor axivî u wiha got: “Em hatin piştgiriye bidin gelê Nisêbînê. Gel 18 roj in li dijî êrîşên li ser Rojava piştgiriyê didin gelê Rojava. Duh salvegera komkujiya Roboskî bû. Bila desthilata AKPê baş zanibe ku heta kujerên Roboskî neyên darizandin, bila kes li Tirkiyeyê qala qiqûq u demokrasiyê neke. Heta kujer neyên darizandin, dê demokrasî pêş nekeve. Dîsa çend roj berê hevalên me yên Rojnameger Cîhan Bîlgîn û Nazim Taştan li ser kar hatin kuştin. Em wan bibîr tînin. Em dibêjin ew rojnamevanên heqîqeta gelan bûn. Em qet wan ji bîr nakin.”
Bêyî Kurdan pirsgirêk çareser nabe
Sînan Çîftyurek da zanîn ku îro li Rojhalata Navîn dixwazin pergalek nû ava bikin û wiha got: “Eger armanc dikin ku li Rojhilata Navîn pergalek nû ava bikin, divê baş zanibin ku bêyî Kurdan aştî û çareserî pêş nakeve. Eger bixwazin li Sûriyeyê pergala uniter ava bikin, dê dîsa rê li pêşiya şer û tundiyê vekin. Ji ber vê yekê gel vê yekê qebûl nakin. Çareserî ji bo Sûrî pergala Federasyona demokratîk e. Bila li pergala Xweseriya Demokratîk a Bakur û Rojhilatê Sûriyeyê binerin, dê çareseriyê bibînin. Em dixwazin pirsgirêka Kurd bi rêya aştî û demokratîk çareser bike. Ji ber vê yekê banga me ji dewletê û hikûmetê re ew e ku navê paradîgmaya xwe diyar bikin. Divê navê Kurd lê bikin.”
Bi înkarê pirsgirêk çareser nabe
Parlamentera Mêrdînê Salîha Aydenîz jî axivî û wiah got: “Îro 18 roj in em li ser sînor Nobeta Aştî û Azadiyê digirin. Îro meseleya li Rojhilata Navîn meseleya demokrasiyê ye. Îro geşedanên li Bakur û Rojhilatê Sûriyeyê pêş dikevin, meseleya demokratîkbûna Rojhlata Navîn e. Mesele bi înkar û nenaskirina gelan çareser nabe. Bi înkara baweriyan, çandan, înkara azadiya jinê û înkara şoreşa jinê tu dewlet nagêjin armancê. 100 salin li Rojhilata Navîn pergala Netew Dewletê heye. Me dît ku netew dewlet Rojhilata Navîn di nava xwînê de dihêle. Çareserî naskirina azadiya jinê, nasîna şoreşa jinê, nasîna bawerî, nasname û çandan e.”
Rojava xwedî paradîgmaya Birêz Abdullah Ocalan e
Salîha Aydenîz, anî ziman ku îro eger li Rojhilata Navîn şer didome, sedema wê înkara ol, bawerî, nasname û çandan e û wiha berdewam kir: “Eger dixwazin li Rojhilata Navîn pêşketinek çêbibe, divê berî her tiştî statuya gelê Kurd nas bikin. Niha hevdîtinek pêk hat. Divê ev hevdîtin bidome, divê her kes rol û rista xwe ya ji bo aştî û demokrasiyê bilîze. Îro Rojava xwedî pergalek e. Xwediyê vê pergalê jî Birêz Abdullah Ocalan e. Îro li Rojava gavek rast hatiye avêtin. Ji bo gev pergal pêş bikeve û mezin bibe, emê heta dawî têbikoşin.”
Daxuyanî bi çepik û dirûşmeyan bi dawî bû.
