Li Stanbolê malbatek kurd ji ber guhdarkirina muzîka Kurdî rastî îşkenceya polîsan hatin. Mexdûrên îşkenceyê li ber edliyeyê îşkenceya polîsan vegotin.
Li navçeya Bayrampaşayê ya Stenbolê 7 kesên ku ji ber guhdarîkirina muzîka kurdî rastî îşkenceyê hatibûn û hatibûn binçavkirin derxistin 7emîn Dadgeriya Cezaya Sulhê ya Çaglayana Stenbolê. 3 kes piştî îfadeyê bi şertê kontrola edlî serbest hatin berdan. Mexdûrên îşkenceyê li ber edliyeyê daxuyanî dan.
Parlamantera Stenbolê ya Partîya Wekhevî û Demokrasîyê ya Gelan (DEM Partî) Çîçek Otlu û gelek kes beşdarî daxuyaniyê bûn. Di daxuyaniyê de dirûşmeyên “Bê ziman jiyan nabe”, “Rûmeta mirovahîiyê wê îşkenceyê têk bibe”, “Li dijî faşîzmê mil bi mil” û “Em ê rê nedin nîjadperestiyê” berz kirin. Endama OHDê parêzer Bêrîvan Bekçî ewilî axivî û duyar kir ku di bûyerê de li hember polîsan derneketine û got: “Ew rastî tundiya polîsan hatine. Em ê bibin şopdarê doza tundiya hêzên ewlehiyê.”
Parlamenter Çîçek Otlu jî diyar kir ku wan gelek caran bûyerên bi vî rengî dîtine û wiha axivî: “Divê li vî welatî îşkenceya polîsan nebe. Sûcê îşkenceyê sûcê li dijî mirovahiyê ye. Em dixwazin kesên ku îşkence li gelê me dikin bên cezakirin. Em ê vê dozê bişopînin.”
Piştre Hevseroka DEM Partiyê ya Stenbolê Arîfe Çînar axivî û got: “Eger dibêjin li vî welatî hiqûq heye, divê sûcê li dijî mirovan bi rêya hiqûqê bê lêkolînkirin. Mîna vê bûyerê mafê qanûnî yê hêzên ewlehiyê tune ku pêhnan li zikê jineke ducanî bixe, jiyana jinê û jiyana pitika di zikê wê de bixin xetereyê.”
Umît Kaya ku di bûyerê de ajokarê wesayîtê bû û bi şerta kontrola edlî serbest hate berdan, diyar kir ku di wesayîtê de sîstema dengê bilind tune bû, tenê dengê radyoyê yê normal hebû û wiha axivî: “Min ji neynikê paşve polîsekî dît ku wêneyê min dikişand. Min pirsî ka çima wêne dikişîne. Wî bi awayekî argoyî got ku tu nikarî bi dengê bilind muzîkê vekî. Gava birayên min ji wesayîtê peya bûn, wî destê xwe avêt çeka xwe. Hê ti hişyarî jî nekirî polîsên sivîl xwe avêtin qirika birayê min. Me ti heqaret li wan nekir. Dema min hewl da xwişka xwe ya ducanî ji erdê rakim, wan dest bi reşandina gazê kir. Em rastî gelek îşkenceyan hatin. Ev ne mirovahî ye. Ez spasiya DEM Partî û parêzeran dikim.”
Bavê wan Mehmet Kaya jî diyar kir ku “Dema em ji seyranê vedigeriyan me muzîka Kurdî guhdarî dikir. Polîsekê wêneyê me kişand û kurê min jî ji polîs pirsî ka çima wêneyê me dikişinî? Ji ber ku muzîka Kurdî lêdixist, polîs aciz bû. Polîs piştgirî xwest. Tîmek hat. Min israr kir, got ez û malbat xwe ne. Lê mixabin, wan guhdarî min nekirin. Li zarokên min xistin. Keça min a ducanî ji ber lêdanê ji ser hişê xwe çû û ket erdê, li erdî jî li zikê wê xistin. Ez rastî vê heqaretê hatim, bila malbatên din rastî vê neyên.”
Endamê MYK’ê yê DEM Partiyê Mûsa Pîroglu jî bertek nîşanî îşkenceya polîsan da. Pîroglu diyar kir ku kesên ku li nava kolanê îşkence li malbatekê dikin, li hember dizan tiştekî nakin û got: “Daxwaza aştiyê ji bo vê ye. Ew ne ew kes in ku li ser vî gelî fermanê derdixin. Daxwaza aştiyê ji bo hiqûq ji nû ve bê avakirine. Aştî ne tenê ji bo Kurdan e. Aştî tê wateya ku ew nikarin vê zordariyê bikin. Bila ev zordar bizanibin ku em ê bi ser bikevin. Amir û Wezîrê Karên Hundir berpirsên kirinên polîsan e. Daxwaza aştiyê ji bo darizandina mafya û baronan e. Em ê têkoşîna xwe bidomînin.”
