Wan – Rêveberê KURDÎGEHê Bîrhat Dûman ku bi boneya 21ê Sibatê Roja Zimanê Dayikê ya Cîhanê axivî û bal kişand zextên li ser zimanê Kurdî û got: “21ê Sibatê ji bo xwedî derketina zimanên dayikê roja deng derxistinê ye.”
Saziya Perwerde, Zanist û Çandê ya Neteweyên Yekbûyî (ÛNESCO) di 17ê Mijdara 1999an de 21ê Sibatê weke Roja Zimanên Dayikê ya Cîhanê ragihandibû û ev roj ji wê demê ve tê pîrozkirin. 21ê Sibatê di eslê xwe de salvegera kuştina xwendekarên zanîngeha Bangladeşî ye. Ev xwendekar ji bo Tevgera Zimanê Bengalî serî rakiribûn û polîsan êrişî wan kiribû û komek ciwanê Bangladeşî kuştibûn. Ev roj di heman demê de wek roja bîranîna van ciwanan e. Lewma UNESCOyê ji bo wan şagirtan bi bîr bîn e, 21ê Sibatê ragihand ku bibe Roja Zimanê Dayikê ya Cîhanê.
KURDÎGEH bê navber dixebite
Kurd jî her sal vê rojê bi coş û çalakiyan pîroz dikin û daxwaza mafê zimanê Kurdî dikin. Gelek sazî, komele û kesayetên Kurdî ji bo xwedîderketina zimanê dayikê di vê rojê de çalakiyan li dar dixin û daxuyaniyan didin.
Komeleya Pêşvebirina Çand û Zimanê Kurdî (KURDÎGEH) ku li Wanê Xebatên ziman bi rê ve dibe, bi waneyên zimanê Kurdî û ji bo avakirina hişmendiya zimanê dayikê xebatan dimeşîne. KURDÎGEH, ev 4 meh in ava bûye û heta niha polek asta yekemîn, polek jî asta duyemîn qedandiye. Her wiha polek asta yekemîn ku ji 30 şagirtan pêk tê, li ber vekirinê ye.
Tê payîn ku pola asta mamostetiyê jî di nava van rojan de dest pê bike. Her wiha KURDÎGEH ji bo hişmendiya ziman ava bike, wê li taxên Wanê û navçeyan jî nûnertiyên xwe veke. Rêveberê KURDÎGEHê Bîrhat Dûman anî ziman ku xebatên wan ên ji bo avakirina nûnertiyan li ber qedandinê ve diçe.
‘21ê Sibatê roja deng derxistinê ye’
Bîrhat Dûman da zanîn ku rojên weke 21ê Sibatê ji bo zimanên bi bişaftinê re rû bi rû mane rojeke deng derxistinê ye. Bîrhat Dûman destnîşan kir ku ji bo bala gel bikişînin ser zimanê dayikê û polîtîkayên pişaftinê ev roj tê pîrozkirin û got: “Ne tenê ji bo zimanê Kurdî, ji bo zimanên din ên cîhanê jî derbasdar e. Divê Kurdî jî weke zimanên din xwedî statu be û mafê perwerdehiyê bê nasîn. Ev bi salan e zext û zoriya li ser Kurdî bi awayekî sîstematîk didome. Erka parastina zimanê Kurdî dikeve ser milê me Kurdan. Em dixwazin civakek pirzimanî ava bibe û zimanê Kurdî bibe xwedî statu. Divê em li zimanê xwe xwedî derbikevin ku zimanê me winda nebe. Divê neyê jibîrkirin ku her netew bi zimanê xwe heye.”
‘Bila ala zimanê Kurdî li jorê ba bibe’
Bîrhat Dûman diyar kir ku di demên pêş de wê kongreya KURDÎGEHê li dar bixin û bang kir ku ji bo xwedîderketina zimanê Kurdî bila gelê Wanê bê di nava rêveberiya nû ya KURDÎGEHê de cih bigire. Bîrhat Dûman bang li ciwanan kir ku xwedî li zimanê xwe derkevin û ala zimanê Kurdî li herî jorê ba bikin.
