Mamosteyê Kurdkî Rifat Ronî hepisxaneyan de teda û zilm ser vat ke nika hepisxaneyan de zî çi heyfo ke Kurdkî ser zilm esto, embazê ke kultur, ziwan û tarîxê xo elaqadar bîyê, cezayan reyde rî bi rî manenê
Tirkîya de her ke şono polîtîkayê asîmîlasyonî zêdîyenê, verba nê polîtîkayê lêşînî de zî sazî û dezgehê ziwanî, xebatanê xo domnenê. Nê sazîyan ra tewro muhîm Komeleya Cigêrayişê Ziwan û Kulturanê Mezopotamyayî (MED-DER) ya. Polîsan hêrişê banê MED-DER’î kerdê, rayber û hemserekê sazîye girewtê binçiman, demê operasyonî de mamosteyê Kurdkî Rifat Ronî ame hepskerdiş.
Mamosteyê Kurdkî Rifat Ronî hepsî ra veradîya û ajansê ma rê qise kerd.
Mamosteyê Kurdkî Rifat Ronî dîyar kerd ke xora yeno zanayiş ke 24 Êlule de sazgehanê ziwanê Kurdkî ser o operasyonêk virazîya û armancê înan ziwanê Kurdkî bî û wina vat: “Dima ke ma şîyê zîndan, ma dî senî ke teber ra ziwanê Kurdkî ser o tehda est a, ney ra zafêr zere de zî est o. O îzolasyono ke teber ra est o hepsîyan ser o zî kerdene, bi taybetî seba ziwanî.”
Notêk bi Kurkî bibo dest danê ser
Rifat Ronî aşkera kerd ke ê şênê vajê ke kitabê Kurmancî qet çin ê la eke keyeyê hepsîyan înan rê kitabêk bierşawê, îdareyê hepisxaneyan dest nano ser û wina domna: “Seba heme kitabî goreyê qanûnanê qedexeyêk înan ser o çin o, coka eke zaf mecbur bimanê ke bidê, o wext zî 2-3 aşman ra pey danê. Sewbîna wexto ke embazî nuşte û mektûban nusenê yan zî notêk xo rê nusenê, eke bivînê ke nuşteyêk bi Kurdkî ameyo nuştene, dest danê ser û gênê benê, destûr nêdanê.”
Komara Tirkîya ra heta ewro
Ronî wina qedîna: “Uca de zî ma vînenê senî ke teber ra polîtîkayê ziwanî bi des serrano ke yenê kerdene, awanbîyayîşê Komare Tirkîya ra heta ewro senî tehda bena, zere de ney ra zafêr yeno kerdene. La reyna zî embazê hepsî ke bi serran o seba kultur, ziwan û tarîxê xo cezayan reyde rî bi rî mendî, seba ke ziwanê xo bipawê cehdkerdişê înan zî est o.”
