Kampanyaya Navneteweyî bi daxuyaniyekê balkişand ser civîna Komîteya Wezîran a Konseya Ewropayê û ji bo bicihanîna biryarên Dadgeha Mafên Mirovan a Ewropayê û naskirina mafê hêviyê banga çalakiyan kir.
Kampanyaya Navneteweyî ya Ji Abdullah Ocalan re Azadî û ji Pirsgirêka Kurd re Çareseriya Siyasî, beriya civîna Komîteya Wezîran a Konseya Ewropayê ku wê di meha Hezîranê de li Strasbourgê kom bibe, daxuyaniyek da. Di daxuyaniyê de hate bibîrxistin ku divê biryara mafê hêviyê ya Dadgeha Mafên Mirovan a Ewropayê (DMME) ya sala 2014an ji aliyê Tirkiyeyê ve bê cîbicîkirin û ji komîteyê hate xwestin ku di vî warî de rola xwe ya çavdêriyê bi awayekî çalak bi cih bîne.
Hate destnîşankirin ku di civînên berê de ji Tirkiyeyê hatibû xwestin ku di vî warî de gavan bavêje û tê payîn ku heta Hezîrana 2026an raporeke pêşketinê pêşkêş bike.
Di pirsgirêka Kurd de qonaxeke krîtîk
Kampanyayê destnîşan kir ku di çareseriya pirsgirêka Kurd de qonaxeke krîtîk hatiye derbaskirin. Di daxuyaniyê de hate bi bîr xistin ku Rêberê Gelê Kurd Abdullah Ocalan di pêvajoya aştiyê de aktorekî girîng e û anî ziman ku ji bo pêkanîna azadiya wî divê têkoşîn bê mezin kirin. Di daxuyaniyê de ev tişt hatin gotin:
‘Di dema şer de divê em aştiyê biparêzin’
“Di têkoşîna ji bo çareseriya siyasî ya pirsgirêka Kurd de em gihîştin qonaxeke krîtîk. Aştî li asoyê xuya dike, em dikarin bi mezinkirina hewldanên xwe yên hevpar hem li Kurdistanê hem jî li qada navneteweyî bigihîjin vê aştiyê. Di vê çarçoveyê de em Rêberê Gelê Kurd Abdullah Ocalan, weke destpêkerê sereke yê pêvajoya aştiyê ya heyî ya li Tirkiyeyê dibînin. Bandora Ocalan digihîje geşedanên li herêmên Kurdan ên cîran jî. Di demekê de ku şerên cîhanî derdikevin, divê em parastina îhtîmala aştiyê bikin û li pişt kesên ku ji bo pêkanîna vê yekê dixebitin bisekinin.”
Ji bo Konseya Ewropayê banga ‘bikeve tevgerê’
Di dewamiya daxuyaniyê de ji bo Ocalan wekî mîmar û muxatabê navendî yê van hewldanan hate pênasekirin û banga azadiyê hate kirin. Her wiha bang li Komîteya Wezîran a Konseya Ewropayê hate kirin ku ji bo biryara DMMEyê û biryara Komîteyê bê cîbicîkirin bikeve nav hewildanê.
Banga name û çalakiyên li qada dîjîtal
Di daxuyaniyê de her wiha ji bo nivîsandina nameyan, îmzekirina kampanyayan, afirandina hişmendiyê di medyaya dîjîtal de û meşandina çalakiyên cuda yên civaka sivîl bang li piştgiran hate kirin. Hate diyarkirin ku formên nameyên pêwîst û navnîşanên dewletên têkildar dikarin ji malpera ‘Ocalan Vigil’ê bên girtin. Hate xwestin ku wêneyên çalakiyên têne lidarxistin ji navnîşana e-peyamê ya ocalanvigil@gmail.com an jî hesabê @Vigil4Ocalan re werin şandin û hate zanîn ku ev wêne wê di platformên kampanyayê de werin parvekirin.
