Li bakurê Kurdistanê û Tirkiyeyê di mehekê de 41 rojnamevan hatin binçavkirin, 10 rojnamevan hatin girtin û li Rojava jî 2 rojnamevan hatin kuştin.
Li bakurê Kurdistanê û Tirkiyeyê êriş, zext, zor û astengkirinên li dijî rojnamevanan berdewam dikin. Li bakurê Kurdistanê û Tirkiyeyê di mehekê de 41 rojnamevan hatin binçavkirin, 10 rojnamevan jî hatin girtin. Her wiha di encama êrişek SÎHAyê ya Tirkiyeyê de rojnamevan Nazim Daştan û Cîhan Bîlgîn ên ji bakurê Kurdistanê li Rojava hatin kuştin.
Her wiha nûçeçêkirina rojnamevanan hate astengkirin, ew hatin îşkencekirin di binçavan de gef li wan hate xwarin.
Rojnamevanên ku di nava mehekê de hatin binçavkirin, girtin û kuştin wiha ne:
Di çarçoveya lêpirsîna Serdozgeriya Komarê ya Eskîşehîrê de 26ê Mijdarê li gelek bajaran bi ser malan de hatibû girtin û Seroka Komeleya Rojnamevanên Jin a Mezopotamyayê Roza Metîna, rojnamevan Erdogan Alayumat, Tugçe Yilmaz, Bîlge Aksu, Ahmet Sumbul, Bîlal Seçkîn, Mehmet Ûçar, Havîn Derya, Sûzan Demîr, Dogan Guzel, Berfîn Atli hatibûn binçavkirin. Ji rojnamevanan Mehmet Ûçar û Bîlge Aksû di 29ê Mijdarê de hatin girtin. Nivîskar Hîcrî Îzgoren jî di çarçoveya heman lêpirsînê de hatibû binçavkirin û piştî îfadeyên li edliyeyê hatibû berdan.
Xebatkarê Yenî Yaşamê Serhat Dûrmûş ê di 11ê Kanûnê de li Sêrtê hatibû binçavkirin di 13ê Kanûnê de bi îdiaya “alîkariya rêxistinê kiriye” hate girtin.
Rojnamevan Nevşîn Mengu bi hinceta ku bi Hevserokê Partiya Yekitiya Demokratîk (PYD) ê berê Salih Muslim re li ser hesabê xwe yê medya dîjîtal hevpeyvîn kir, di çarçoveya lêpirsîna Serdozgeriya Komarê ya Stenbolê de 14ê Kanûnê hate binçavkirin û piştî wergirtina îfadeyê hate berdan.
Daştan û Bîlgîn hatin kuştin
Rojnamevan Nazim Daştan û Cîhan Bîlgîn di 19ê Kanûnê de dema êrişên Tirkiyeyê û komên SMOyê yên bi ser wê ve li rojavayê Minbicê dişopandin, li ser rêya di navbera Pira Qereqozaq û Bendava Tişrînê de di encama êrişa SÎHAya Tirkiyeyê ve hatin kuştin.
Rojnamevan Ozlem Gurses ji ber weşana li ser qenala xwe ya Youtubeyê kir, di çarçoveya lêpirsîna Serdozgeriya Komarê ya Stenbolê da destpêkirin de 20ê Kanûnê hate binçavkirin û derbarê wê de biryara hepsa malê hate dayîn.
Li Wanê 10 rojnamevan hatin binçavkirin
Komeleya Rojnamevanan a Dîcle Firatê (DFG) û Komeleya Rojnamevanên Jin a Mezopotamyayê (MKG) xwestin di 20ê Kanûnê de li Wanê têkildarî kuştina rojnamevan Nazim Daştan û Cîhan Bîlgîn daxuyaniyê bidin.
Di dema daxuyaniyê de polîsan koma rojnamevan û siyasetmedar di nav de bûn dorpêç kirin û nehiştin daxuyanî were dayin. Di encama êrişê de nûçegihanên Ajansa Welat (AW) Bazîd Evren û Firat Tunç, nûçegihanên Ajansa Mezopotamyayê (MA) Rûken Polat, Ozlem Yacan, Mazlum Engîndenîz û Sema Yuce Polat, nûçegihana JINNEWSê Memîhan Zeydan û rojnamevan Zelal Tûnç, Nîmet Olmez, Oktay Candemîr û gelek siyasetmedar û nûnerên rêxistinên sivîl hatin binçavkirin.
Li Stenbolê 18 rojnamevan hatin binçavkirin
Her wiha Komeleya Rojnamevanan a Dîcle Firatê (DFG), Komeleya Rojnamevanên Jin a Mezopotamyayê (MKG) û DÎSK Basin-Îşê di 21ê Kanûnê de xwestin têkildarî kuştina rojnamevan Nazim Daştan û Cîhan Bîlgîn li Qada Şîşhane ya Stenbolê şermezar bikin. Rêveber û nûnerên rêxistinên civaka sivîl, partiyên siyasî û rojnamevanan jî piştgirî dan rojnamevanan. Polîsan êrişî çalakiyê kir û di encama êrişê de rojnamevan Rozerîn Gultekîn, Ferhat Sezgîn, Melîk Çelîk, Pinar Gayip, Enes Sezgîn, Osman Akin, Hayrî Tûnç, Yadîgar Aygun, Serpîl Unal, Zeynep Kûray, Mûstafa Sûbaşi, Salîha Aras, Gulistan Dûrsûn, Mahsûm Saglam, Can Papîla, Elîf Baybûrt, Ûmût Taştan û Rojdan Erez jî di nav de 59 kes hatin binçavkirin.
7 rojnamevan hatin girtin
Ji binçavkiriyan 45 jê duh piştî karûbarên qereqolê hatin berdan. Rojnamevan Hayrî Tunç, Gulistan Dûrsûn, nûçegihana ETHAyê Pinar Gayip, nûçegihana Gazete Patîkayê Yadîgar Aygun, nûçegihana Rojnameya Mucadele Bîrlîgiyê Serpîl Unal, Zeynep Kuray, ji Rojnameya Yenî Yaşamê Mahsum Saglam, Enes Sezgîn û Osman Akin jî di nav de 14 kes sewqî Edliyeya Çaglayanê kirin. Binçavkirî bi îdiaya “Muxalefeta li dijî qanûna civîn û xwepêşandan” û “Propagandaya rêxistinê” hatin tawanbarkirin. Dozgeriyê; piştî îfadeyê bi daxwaza girtinê sewqî Dadgeriya Cezayê Sulhê kir.
Piştî 14 kesan li Dadgeha Cezayên Sulhê îfade dan, heyeta dadgehê 5 kes bi şertê kontrola edlî serbest berdan, 7 jê rojnamevan 9 kes jî girtin û şandin girtîgehê. Heyeta dadgehê rakirina wêneyên rojnamevan Nazim Daştan û Cîhan Bîlgîn wekî hinceta girtinê nîşan da.
Navên rojnamevanên ku hatin girtin wiha ne: Gulistan Dursun, Hayri Tunç, Enes Sezgin, Osman Akin, Can Papîla, Pinar Gayip û Serpîl Unal.
