Li gorî agahiyên ku SOHRê parve kirin, li Sûriyeyê di 24 saetên dawîn de 10 kes hatin kuştin.
Navenda Çavdêriya Mafên Mirovan a Sûriyeyê (SOHR), têkildarî şerê li Sûriyê agahî parve kirin û destnîşan kir ku li Sûriyeyê di 24 saetên dawîn de bi kêmanî 10 kes hatine kuştin.
SOHRê diyar kir ku li bajarokê Zebletanî yê Şamê zarokeke keçîn(3) ku beriya hefteyekê hatibû revandin, kuştî hat dîtin. Li bajarê Hemayê leşkerekî “Firqeya 4an” ya girêdayî rejîma berê di êrişa çekdarên nenas de hat kuştin, li gundewarê Tertûsê jî ciwanek berê hatibû revandin, kuştî hat dîtin. Li gorî SOHRê li Dêrazorê zarokek ji ber teqîna mayînekê ya bermahiyên şer jiyana xwe ji dest da, li Meskena ya gundewarê Helebê jî zarokek bi heman awayî jiyana xwe ji dest da. SOHRê da zanîn ku li gundewarê Humsê jî komeke çekdar ku li motorsîklêtê bû, gule li sivîlekî reşand û ew kuştin. Li gundewarê Idlibê jî endamekî hêzên ewlehiyê yên desthilata Şamê hat kuştin.
Hate diyarkirin ku li devera Sifêra ya gundewarê Helebê jî leşkerekî berê yê rejîma Baasê hat kuştin, li bajarê Helebê jî alîkarekî yekemîn a “Ewlehiya dewletê” ya rejîma berê hat kuştin. Hat zanîn li Eşarayê jî zarokek di encama teqandina çekan ku jêdera wê nehat zanîn, hat kuştin.
