Bi pêşengtiya jinên TJA û DEM Partiyî starta Newroza Îzmîrê hate dayin. Agirê Newrozê li Kadîfekaleyê hate vêxistin ku Rahşan Demîrel li wir bedena xwe şewitandibû.
Bi pêşengiya Tevgera Jinên Azad (TJA) û Meclisa Jinan a Partiya Wekhevî û Demokrasiyê ya Gelan (DEM Partî) a Îzmîrê, bi dirûşma “Em li dijî qirkirina jinê serî hildidin, ber bi azadiyê ve dimeşin” daxuyaniyeke çapemeniyê hat dayîn û li Îzmîrê starta pîrozbahiyên Newrozê hate dayîn. Daxuyaniya ku dihat xwestin li Kadîfekaleyê bê dayîn, ji ber astengiya polîsan li ber kelehê hat dayîn. Di daxuyaniyê de pankarta “Newroza Azadiyê pîroz be” hat hilgirtin. Girseyê bê navber dirûşmên “Ji şer re na, aştî a niha”, “Newroz pîroz be” û “Şehîd namirin” berz kir.
Parlamentera DEM Partiyê ya Îzmîrê Bûrcûgul Çûbûk, Parlamentera DEM Partiyê ya Mûşê Sumeyye Boz û gelek jin û welatî beşdarî daxuyaniyê bûn. Agirê Newrozê ji hêla Sumeyye Boz û Dayika Aştiyê Behiye Yalçin ve hate vêxistin. Piştre jî girseyê li ber def û zirneyê govend gerand.
‘Kadîfekale ji bo têkoşîna me ya azadiyê semboleke dîrokî ye’
Hevseroka DEM Partiyê ya Îzmîrê Fulya Erdogan, silavên xwe pêşkêşî jinên ku agirê Newrozê geş dikin, kir û got: “Agirê Newrozê ku me îro li Kadîfekaleyê vêxist, ji hêla jinên berxwedêr Zekiyeyan, Rahşanan û Bêrîvanan heta roja îro anîn; serhildana jinên ku li dora têkoşîna azadiyê azad bûne ye. Silav ji jinên ku bi ruhê 8’ê Adarê li dora vî agirê berxwedanê kom bûne re. Kadîfekale ji bo têkoşîna me ya berxwedan û azadiyê semboleke dîrokî ye. Cejna gelan û jinên ku li dijî zilma zaliman li ber xwe didin e. Bi ruhê berxwedanê yê agirê Newrozê we hemûyan silav dikim û dibêjim Newroz pîroz be.”
Parlamentera DEM Partiyê ya Îzmîrê Burcugul Çubuk jî diyar kir ku wan li kelehê li cihekî girîng bi ruhê Rahşanê re hevdîtin pêk anîne û ev tişt anî ziman: “Ruhê ku me pê re hevdîtin kir, ruhê bawerî û îradeyê ye. Ruhê kesên ku jiyana ku tê xwestin jin tê de bin bi ser dikeve û helbet ruhê ku em pê re rû bi rû ne, têkoşîna aştiyê ya ku jin pêdiviya wê pê heye. Yên ku tu carî dest ji vê têkoşînê bernedin, wê li seranserê vê erdnîgariyê vê aştiya bi rûmet, edalet û wekheviyê misoger bikin. Newroz pîroz be.”
‘Wê ev Newroz bi watedartir be’
Parlamentera DEM Partiyê ya Mûşê Sumeyye Boz jî wiha got: “Îro, rojeke girîng e. Lewma em li vir agirê azadiyê û agirê aştiyê vêdixin. Armanca me ya hatina vir ne tenê pîrozkirina Newrozê ye. Em ji bo pîrozkirina pêşketina têkoşîna ku bi sedsalan tê meşandin hatin. Ev der qada têkoşînê ye. Bangek mezin ji aliyê birêz Abdullah Ocalan ve li hemû gelan, Rojhilata Navîn, Tirkiye û Kurdistanê hate kirin. Di vê Newrozê de em ê aştî û civaka demokratîk hembêz bikin. Wê ev Newroz bi coş, mezintir û bi watedartir be. Ji Rojhilata Navîn heta Rojava wê agirê azadî û aştiyê, civaka demokratîk û civaka wekhev li her derê bê vêxistin. Ev agir wê li hemû cîhanê bigere û aştiyê bi destê Kurdan bîne.”
Di heman demê de ji bo pîrozbahiya Newrozê ya ku dê di 22’yê Adarê de li Qada Gundogduyê were lidarxistin, banga hate kirin. Bername, bi gerandina govendê bi dawî bû.
