Sazgehê MED-DER’î do siba seba wendekaranê ke atolyeyê xo ya ziwanî bi serkewtiş qedînayê, şayîya belgedayîşî organîze bikera.
Sazgehê MED-DER’î ke bi serran o xizmetê lehçeyanê kurdkî keno, her serre demo ke dewreyê atolyeyanê ziwanî qedîyenê bi şayîyêk belegeyanê wendekaranê xo dano. MED-DER do siba bi programêko mirdîya xo dekerde şayîyêk organîze bikero û belgeyanê wendekaranê xo bido.
Programê şayî do bi rêze belgedayîş, sanikvatoxî, muzîk û vatişê şîîran dewam bikero. Şayîya belgedayîşî ya MED-DER’î do cayê komele de siba saete 14:00î de bêro kerdene. Sazgehê MED-DER’î hesabê xo yê X’î ser o parekerdişêk kerd û parekerdişê xo de heme şarê xo silayna şayîya belgedayîşî.
Parekerdişê MED-DER’î wina yo: “Dayîşê belgeyanê serkewtişî seba mamosteyan cayê sereberzî yo. Girewtişê belgeyan zî seba wendekaran cayê keyfweşî yo. Ma heme şarê xo silaynenê şayîya belgedayîşî ya MED-DER’î.”
