Goreyê agahî û vîdeoyanê ke çimeyanê herême ra ameyê girewtene, Îsraîl û Amerîka ewro dayo qerargahê rejîmê Îranî yê şaristananê Serdeşt, Banê û Îlamî yê Rojhelatê Kurdîstanî ro û encamî de zerarê merdimî û madî vejîyayê orte.
Şerê Îsraîl-Amerîka û Îranî roja 5. de dewam keno. Goreyê agahdarî û vîdeoyanê ke çimeyanê herême ra ameyê girewtene, teyareyê şer ê Îsraîl û Amerîka ewro dayo bingeyê leşkerî yê rejîmê Îranî yê şaristananê Banê ro. Vîdeoyan de ke torranê komelkî de ameyê vilakerdene, yeno vînayene ke dimayê hêrişan teqîyayîşê girdî qewimîyenê û herême ser o duman berz beno.
Îlam de zî qerargehê rejîmî hedef ameyê girewtene
Goreyê agahî û vîdeoyan bingeyê leşkerî yê artêşê Îranî Îlam de zî encamê hêrişanê asmênî de ameyê vistene. Heta ame dîyarkerdene ke encamê hêrişan de vîndîbîyayeyê rejîmî est ê û zerarêko gird ê madî resayo qerargehanê ke ameyê hedefgirewtene.
Serdeşt de reya yewine hêriş ame kerdene
Banê û Îlamî reyde ewro reya ewiline şaristanê Serdeşt de zî hêriş ame kerdene. Encamê bombardumanî de qerargehanê rejîmî yê ke Serdeşt de yê, teqîyayîşêko gird qewimîya. Encamê hêrişan de zerarê rejîmî yê girdî bîyê la hûmarêka zelale nêameye zanayene.
