Parlamenterê DEM Partî Omer Ocalan ke Rayberê şarê Kurdî Abdullah Ocalanî reyde kom bîyî, vat ke Apoyî vato: “Statuyê mi muhîm o. Ganî no eşkera bibo. Statuyê mi statuyê kurdan o.”
Omer Ocalanî ke Ajansa Mezopotamya rê qisey kerd, agahîya kombîyayîşê 26ê sibate daye. Keyeyî, Îmralîyî de Rayberê Şarê Kurdî Abdullah Ocalan, Hamîlî Yildirim, Omer Hayrî Konar, Ergîn Atabey û Mahmut Yamalakî reyde kom bîyê.
Omer Ocalanî vat ke înan nêzdîyê 2 saetan Rayberê Şarê Kurdî Abdullah Ocalan reyde kombîyayîş kerdo û heta nika 6 rey kom bîyê.
Omer Ocalanî vat: “Serekî zaf babetî ard ziwanî û zaf noqteyan de nirxnayîşî kerdî. Rayberê Şarê Kurdî Abdullah Ocalan kombîyayîşê yewinî ra babeta Îran, Sûrîye û Iraqî ser qisey kerdbî û fikranê xo derheqê bîyayîşan de vatbî.”
Mudaxeleyê Îranî sewîyeya dîyin a
Omer Ocalanî qiseykerdişê Rayberê Şarê Kurdî Abdullah Ocalan rê nê çîyî vatî:
“Serekî na noqta de vatbî ke ganî şarê ma tedbîr bigîro, ganî sazgehê ma tedbîr bigîrê; çunke Iraq şino, awanîya Sûrîye ya ke est a rijîyena, badê naye eke Îran xo demokratîk nêko do mudaxeleyê Îranî bibo. Nika ma mîyanê sewîyeya dîyine ya nê mudaxeleyî de yê. Mudaxeleyo yewin şerêko 12 rojan dewam kerd, bî. Mudaxeleyo ke nika ya dahîna hîra yo, cografyaya ci dahîna hîra bîya; mudaxeleyêko gird nika beno.”
“Ma do emnîyetê şarê xo senî bipawê û azadîya şarê xo senî temîn bikerê? Nê her di halê konseptî eynî wext de têkilîyêka semîyotîke mîyan de yê. Eke şima emnîyetê şarî temîn bikerê seba azadîya ci zî gamêka muhîme erzenê. La herême de, Kurdîstan de, welatî de kamcîn fehmî vernîya qirkerdişanê giranan de rayîr akenê? No ganî eşkera bêro vatene; eşkerayîyê şovenî, nêzdîbîyayîşê populîstî, nêzdîbîyayîşê ‘ez zana-ez kena’, fatûraya nînan şima rê gird bena. Şar bedelê naye dano.”
Barê prosesî yo giran
“Serekî kombîyayîşê ma de dîyar kerd ke proses giran-giran aver şino. La çiqas ke giran şêro zî vat ke zemînêk virazîyeno. Vat ke sewîyeya ke ameya resnayene seba sîyasetê demokratîkî war akena. Eynî wext de Serekî vat: ‘Heta nika babetêka ke ma nêvatbî nêmende, badê naye hewceyîya gamanê pratîkan est a.’ Herêkatê sîyasî yê kurdan seba înan zî teorî zaf muhîm a. Teorî de zaf babetî tûj benê. Kombîyayîşî est ê, konferansî est ê, kongreyî yenê kerdene. Wîlayetan û qezayan de rêxistinkerdişî yenê kerdene. La nika vat ke hewceyîya babetanê şênberan est a. Hewceyîya sîyasetêko şênber est a. Ganî ma encaman bigîrê û no karê di hetan o. Serekî vat ke zemîn virazîyayo, war akerde yo û na noqte de sazgehê ma û partîya ma ya sîyasîye şênê zaf babetan bikerê.”
Îdareyê herêmkî
“Serekî nê kombîyayîşî de îdareyanê herêmkîyan ser o qisey kerd. Yanî yew het de îdareyê merkezîye, hetê bînî de îdareyê herêmkî û derheqê îdareyê herêmkî de hewceyîya serûberkerdişê qanûnî est a. Serekî dîyar kerd ke ganî seba ke îdareyê herêmkî dahîna aktîf bibo serûberkerdişê qanûnî lez bêrê kerdene. Nê kontekstî de Serekî behsê Şaredarîya Şaristanê Girdî ya Mardînî kerd. Behsê Hemserekê Şaredarîya Mardînî Birêz Ahmet Turkî kerd û nîşan da ke ganî apey şêrê karê xo ser. Serekî qedîyayîşê tatbîqê qayumanî rê manaya girde dano.”
‘Statuyê mi statuyê kurdan o’
“Serekî vat: ‘Heqê hêvîye muhîm o. Meclîsî de zî meseleyê statuyê mi ameyî qiseykerdene. Helbet statuyê mi muhîm o. Ganî no eşkera bibo. Statuyê mi eynî wext de statuyê kurdan o.’ O wext birayê mi Mehmet Ocalan kewt mabên û vat: ‘Şarê ma êdî wazeno ke şima tîya ra bivejîyê û şertanê dahîna azadan de bibê.’ Serekî o wext vat: ‘Vejîyayîşê mi vejîyayîşê şarî yo. Vejîyayîşê şarî vejîyayîşê min o.’ Na noqta de dîyar kerd ke ganî serûberkerdişê qanûnî bêrê kerdene û tena meseleyê xo ney heqê hêvîye ser o zî çend rey qisey kerd.”
Sûrîye û Rojava
“Serek destpêkî ra têkoşîn keno ke Rojava û kurdê ke Sûrîye de ciwîyenê pay ser o vinderê. Têkoşînê girdî yenê rayraberdene. Dîplomasî şertanê tengan de yena rayraberdene. Serek vernîya partîya ma de programê muhîmî ronano. Peymana peyêne de zî rolê ke Serek Apoyî girewt xo ser, zaf gird o. Serek Apoyî naye ra ver zî derheqê Sûrîyeya pêroyî û Rojawan de zaf nirxnayîş kerdbî. Derheqê girewtişê tedbîrab de nirxnayîş kerdbî. Pêşnîyazî kerdbî û nika dewletê ke est ê, vera rijîyayîşî de yê. Tayê kesî propagandakerdişê dewlete kenê û hem têgêrayîşê azadîye, hem sîyasetmedar hem zî şarê ma ser o şerêko psikolojîk kenê. La nê babetê bêmana yê. Însanî bedelanê giranan danê, keda girde danê.”
Selam seba kurdanê Ewropa û Anatolya
“Serek Apoyî selamê xo yê bêsînorî şarê ma yê Ewropa rê şawitî. Vat ke derheqê înan de xebatî est ê, vindeno ke serûberkerdişê qanûnî bêrê kerdene û seba naye kede dano. Vat ke ‘Selamê mi bi taybetî biresnê şarê Ewropa.’
Hetê bînî de ma behsê kurdanê Anatolyaya Mîyanêne û Anatolya kerd. Serekê Apo selamê xo şawitî înan rê zî. Serek Apoyî vat ke no prosesê çareserkerdişî seba estbîyayîşê înan muhîm o û vat: ‘Înan heta nika estbîyayîşê xo pawit.’ Tena Anatolyaya Mîyanêne ney heme Anatolya de, dewrê Osmanîyan de heta verê naye de koç kerd, uca bica bîyî, estbîyayîş û nasnameyê xo pawitî. Heme şarê ma rê selamê xo şawitî. Vat ke ‘Êdî wasitayê dewrê neweyî sîyaset o, sîyaseto demokratîk o, huqûq o. Ganî ey zî bêrê û DEM Partî mîyan de beşdarê çalakîyanê sîyasîyan bibê.'”
‘Kurdkîya mi yê şima ra rindêr a’
“Serek Apoyî îfade kerd ke ‘Ziwanê kurdkî muhîm o.’ Serekî vat: ‘Eke zîhn parçe bîyo ziwan zî parçe bîyo. Eke hêzê şima yê sîyasî çin o hêzê şima yê kulturî zî nêbeno. Eke hêzê şima yê rêxistinbîyayîşî çin o, şima nêşênê ziwanî zî bipawê.’ Ganî ma sere de hêzê zihnî û sîyasî dahîna aktîf, dahîna xurt bikerê ke kulturî de, nasnameyî de ma bieşkê erjanê xo bipawê. Ganî ma wayîrê ziwanê xo bivejîyê, kurdkî dahîna aktîf bikerê. Heta uca de wexto ke kurdkî qisey kerd vat: ’27 serrî yo ke ma tîya de yê. 30 serrî yo ke kesî reyde ma rind qisey nêkenê. Kurdkîya mi yê şima ra rindêr a.'”
