Meclîsê Ciwanan ê DEM Partî yê Stenbolî derheqê tedayanê ciwanan ser o de eşkerayîyêka çapemenî daye. Eşkerayî de ame dîyarkerdene ke hetêkê Derya Marmara, yanî Îmrali de Rayberê Şarê Kurdî Abdullah Ocalan sey sermuzakerekerdoxê prosesî yeno îlankerdene labelê hetê bîn ê Derya Marmara, yanî Kadikoy de posterê Rayberê Şarê Kurdî Abdullah Ocalanî yenê qedexekerdene. Eşkerayî de wina wina ame vatene: “Ma do her ca de fotograf û qiseyanê Rayberê Şarê Kurdî Abdullah Ocalanî vajê.”
16ê gulane de Stenbol de bi pêşengîya DEM Partî bi sloganê “Seba aştî gamêk” rayîrşîyayîşêk amebi organîzekerdene. Rayîrşîyayîşî de sloganê “Bijî Serok Apo” ameybî vatene. Rayîrşîyayîşî ra pey 4 ciwanî bi manayê ku “sloganî vatî” ameybî destbendkerdene û her wina polîsan bi eyn manayî 26 hebî ciwanî gêraybî û venga înan da ke şêrê îfade bidê.
Meclîsê Ciwanan ê DEM Partî yê Stenbolî derheqê na babete de vernîya awanîya DEM Partî ya Stenbolî de eşkerayî daye. Eşkerayî de pankartê “Ciwan serî natewînin, bijî berxwedana ciwanan” ame, akerdene û sloganê “Bijî Serok Apo” û “Bijî berxwedana ciwanan” ameyî vatene.
Eşkerayî de ewil parlamenterê Stenbolî yê DEM Partî Cengîz Çîçekî qisey kerd.
‘Şîma çira hemverê sloganê Bijî Serok Apo vindenê?’
Cengîz Çîçekî dîyar kerd ke ê vera hêrişanê ciwanan ser o ameyê têhet û wina vat: “Polîsî sermayeyî pawenê. Şêrê vernîya kesan de bendan ronê ke wazenê cografyaya ma talan bikerê. Cografyaya Kurdîstanî de polîtîkayêka cîya est a. Ma pers kenê; Amed, Wan, Mardîn û xeylê şaristananê bînan de posterê Rayberê Şarê Kurdî Abdullah Ocalanî ameyî akerdene û nêameyî qedexekerdene. Labelê Stenbol de posterê Rayberê Şarê Kurdî Abdullah Ocalanî qedexe yê. Ma na cîyakarî qebul nêkenî. Ma nê polîsanê Stenbolî ra pers kenî; şima çira hemverê sloganê ‘Bijî Serok Apo’ vindenê?”
Ey ra pey zî endama Meclîsê Ciwanan ê DEM Partî yê Stenbolî Saîme Sema Çalî eşkerayî wende.
‘Îqtîdar wazeno ciwanan û keyeyanê înan bitersno’
Saîme Sema Çal dîyar kerd ke ê vera şerê taybetî ameyê têhet û wina qisey kerd: “Ma vînenî ke îqtîdar zano ke dînamîkê komelkî cinî û ciwanî yê. Seba nê zî bi taybetî cinî û ciwanan kenê hedef. Tewr peyên 16ê gulane de Kadikoy de rayîrşîyayîşêk amebi kerdene. Rayîrşîyayîşî ra pey polîsan 26 hebî ciwanan geyrayê û seba îfadeyî veng da înan. Her wina polîsî gêrayê keyeyanê înan zî. Îqtîdar wazeno bi na polîtîkaya ciwanan û keyeyanê înan bitersno.”
‘Ma do fotograf û qiseyanê Rayberê Şarê Kurdî Abdullah Ocalanî berz bikerî’
Saîme Sema Çal eşkera kerd ke bi manayê vengdayîşê seba îfadeyan zî slogan û fotografê Rayberê Şarê Kurdî Abdullah Ocalanî yê û wina vat: “Rayberê Şarê Kurdî Abdullah Ocalan sermuzekerekerdoxê prosesî yo. Berzkerdişê fotografan û slogananê seba Rayberê Şarê Kurdî Abdullah Ocalanî heqê ma yo demokratîk o. Embazanê ma seba dîyarkerdiş û nîşandayîşê statuyê Rayberê Şarê Kurdî Abdullah Ocalanî bi hawayêko bicesûr rayra şîyê. Hetêkê Derya Marmara, yanî Îmrali de Rayberê Şarê Kurdî Abdullah Ocalan sermuzekerekerdoxê prosesî yeno îlankerdene labelê hetê bîn ê Derya Marmara de zî Kadikoy de posterê Rayberê Şarê Kurdî Abdullah Ocalanî yenê qedexekerdene. Ma zann ke dewleet seba ke fîkrê Rayberê Şarê Kurdî Abdullah Ocalanî mîyanê komelî de vila nêbê, polîtîkayanê qedexekerdişî rayra bena. Ma vanî ke ma do her ca de fotograf û qiseyanê Rayberê Şarê Kurdî Abdullah Ocalanî berz bikerî.”
Eşkerayî bi berzkerdişê sloganê “Bijî Serok Apo” qedîyaye.
Eşkerayî ra pey ciwanê ke polîsan veng dabi înan, bi komî şîyê ke îfade bidê.
