Derheqê rojnameger Zeynep Durgut ke talankerdişê daran ê dewa Êzîdîyan Kiwêx a qezaya Hezex a Şirnexî kerdbi xebere, cipersayîş ame destpêkerdene.
Derheqê muxabira Ajansê Mezopotamya (MA) Zeynep Durgut ke qirkerdişê daran ê dewa Êzîdîyan Kiwêx a qezaya Hezexî ya Şirnexî de kerdbi xebere, cipersayîş ame destpêkerdene. 23ê hezîrana 2025î de amebi waştene ke dekewtişê dewa Kiwêx de qereqol bêro viraştene û amebi îdiakerdene ke seba înşaetê qereqolî darê ke erdanê welatijan ser o yê, ameyê birnayene. Derheqê muxabira MA’yî Zeynep Durgut ke derheqê babete de xebera bi sernameyê “Dewa Êzîdîyan de qereqol yeno viraştene” viraştbî, ciperesayîş ame destpêkerdene. Ame zanayene ke cipersayîş, gerreyê rayberîya HUDA-PAR’î ya Midyadî ra ame destpêkerdene.
Zeynep Durgut avûkatê xo reyde şîye Qereqolê Polîsan ê Rêya Armûşî yê Wanî û îfade da. Zeynep Durgut vat ke xebera ke behsê aye yeno kerdene ke aye viraşta, sey rojnamegerêk wezîfeyê xo ardo ca û vat: “Sey rojnameger wezîfeyê mi o yo ke raya pêroyî hedîseyan ra agahdar bikera.” Zeynep Durgut sucdarîya ke vera aye yena kerdene zî red kerd.
Avûkatê Zeynep Durgut Veysî Atayî zî îfade kerd ke amancê xebere agahdarkerdişê raya pêroyî yo, ganî xebere çarçewaya azadîya xoîfadekerdişî de bêra erjnayene. Atayî vat ke goreyê TCK’yî seba ke xebere biba suc ganî tehlukeyêko şênber û eşkera bibo la xebere de nîşaneyê sucî çin ê.
Zeynep Durgut dimayê îfadeyî qereqolî ra vejîyaye.
