Cipersayîşê Gulîstan Doku de 7 kesê ke fermandarîya cendirmeyan de kar û barê înan ê îfadeyî qedîyayî, berdê edlîye. Wextê ke gumanbarî ardêne edlîye, merdimanê keyeyê Doku vera înan nêrazîbîyîşê xo mojna.
Cipersayîşê vîndîbîyîşê wendekara Unîversîteya Munzurî Gulîstan Doku de, kesê ke vîzêr sewqê Edlîyeya Dêrsimî ameyî kerdene, derheqê 2 kesan de qerarê gîrewtişî ame dayene.
Polîso verên Gokhan Ertok o ke ameyo zanayene ke sim kartê Gulîstan Doku kerdo telefonê xo û tayê agahîyî zî tirawitê; bi sucdarîya “çinkerdiş, nimitiş yan zî vurnayîşê delîlanê sucî” û “xerabkerdiş, çinkerdiş yan zî destfînayîşê daneyanê sîstemê zanistî” ame gîrewtene. Memûrê Îdareyê Taybet ê Şaristanî yê dewrê verênî Erdogan Elaldi zî, rîxmo ke heme sucdarîyî red kerdî, bi sucdarîya “bi qestî kiştiş” ameye girewtene.
Berpirsîyarê kamerayanê Unîversîteya Munzurî Suleyman Onalan û Savaş Gulturk zî bi waştişê girewtişî sewqê Mehkemaya Cezayan a Sulhî ya Dêrsimî ameyî kerdene. Suleyman Onalan û Savaş Gulturk dimayê îfadeyanê xo yê mehkema, bi şertê kontrolê edlî ameyî veradayene.
Ewro zî 7 kesê ke fermandarîya cendirmeyan de kar û barê înan ê îfadeyî qedîyayî, hetê hêzanê asayîşî ra berdê edlîye. Gumanbarê serekeyî Mustafa Turkay Sonel û pawitoxê walî Şukru Eroglu hema zî fermandarîya cendirmeyan de yenê girewtene. Wextê ke gumanbarî berdêne edlîye, ferdê keyeyê Doku bi vatişanê sey, ‘Şima pêro qatil ê. Tuncay Sonel qatil o, wa bêro şima bîxelesno. Homay belayê şima bido’ nerazîbîyîşê xo mojna.
Eynê wextî de maya aye Bedrîye Doku û waya aye Şîlan Doku hişê xo ra şîyî û kewtî erd. Merdimê keyeyê Doku verê edlîye de pawenê ke mehkema do çi qerar bido.
