Sîyasetmedarê ke beşdarê kombîyayîşê eşkerakerdişê deklarasyonê Newroza 2026î bîyî, dîyar kerd ke wazenê Newroza emserî bibo Newroza azadî û yewîya demokratîke ya şarê kurdî.
Beşdaran venga şarî da ke emser zî sey heme serran bi ruhê Kawayê Asinkar waranê pîrozkerdişan ra adirê Newroze berz bikerê. Hemserekê Pêroyî yê DEM Partî Tuncer Bakirhanî vat ke ê wazenê adirê Newroza emserî bibo meşaleya haştî û azadîye.
Kordînasyonê Merkezî yê Newroze Sumerparkê Amedî de bi eşkerayîyêka çapemenîye deklarasyonê Newroze eşkera kerd. Hemserekê Pêroyî yê DBP’yî Çîgdem Kiliçgun Uçar û Keskîn Bayindir, Hemserekê Pêroyî yê DEM Partî Tuncer Bakirhan, Hemverfekê Înîsîyatîfê Yewbîyayîşê Demokratîkî Mehmet Kamaç, aktîvîstê TJA, endamê Meclîsê Ciwanan ê DEM Partî, temsîlkar û rêveberê partîyanê sîyasîyan û yê rêxistinanê komelê sîvîlî û gelekî hemwelatî beşdarê kombîyayîşê deklarasyonî bîyî.
Beşdarî bi cilanê xo yê kurdî beşdarê kombîyayîşî bîyî. Pankartê “Newroza Azadî û Yewîya Demokratîke” ame berzkerdene. Verê eşkerakerdişê deklarasyonî deyîra Komîna Hunermendan a Wanî ya bi nameyê “Newroza Serfirazîyê” ke ameye amadekerdene, ameye temaşekerdene. Metnê deklarasyonî yê kurdkî (kurmanckî) hetê aktîvîsta TJA Fatma Ablay ra ame wendene. Dima beşdaran qisey kerd.
Hemverfekê Yewbîyayîşê Demokratîkî Mehmet Kamaçî da zanayene ke senî ke Kawayê Asinkar vera zordarîye ser kewt, şarê kurdî zî ewro nê hedefî reyde ser kewenê û vat: “Eya, ma reyna yew wextêko tarîxî de pêşwazîya Newroze kenê. Çira vanê roja tarîxîye? Heta nika rast vatêne, ma vatêne ma wextanê tarîxî ra vîyarenê. La ma peynî de vanê, ma rojêka tarîxîye ra vîyarenê. Sey Kawayê Asinkar ke bi hezaran serran ver vera zordarîye xoverdayîşêko bêemsel da û serkewtiş û azadîye ard meydan. Ma vanê şarê kurdî seserran o vera zordarîye zî bedelê zaf giranî dayî. Ma vanê Newroza 2026î seba şarê kurdî wa bibo Newroza azadîye û Newroza serkewtişî. Nê hedefî reyde, ma Newroze pêşwazîye kenê.”
‘Birêz Abdullah Ocalanî na meşale veşnaye’
Hemserekê DEM Partî yê Pêroyî Tuncer Bakirhanî zî dîyar kerd ke verê Rehşane û Mazluman anê xo vîrî û vat ke ê bîyî roşnîya şarê kurdî û wina dewam kerd: “Şarê ma wextanê tarîxî ra vîyareno, ewro Rojhelatê Mîyanênî de gelek çîyî qewimîyenê. Eya, ma vanê Bixeyr ameya Newroze. Bixeyr ameya Newroza adirî. Ma zerrîwazê Newroz ê. Newroze seba şarê kurdî xoverdayîş o, azadî ya. Têkoşînê cu ya. Felsefaya cuye, cuya azadî ya. Şarê ma yê erjîyayî. Dinya mîyanê şerî de ya. Wexto ke ma dormeyê xo ra ewnîyenê, hewce yo ke kurdî bibê yew. Eke kurdî yew bibê, ne adirê Newroze peysêno, ne zî kurdî bin kewenê. Ewro Rojhelatê Mîyanênî de hesabê neweyî est ê. Her kes ser kurdî ser o qisey keno. Wa her kes bizano ke kurdî wayîrê tarîxî yê, tarîxêk ê, wayîrê îradeyê xurt ê. Înşallah, ma azadîya xo, statuyê xo zî bigêrê. Wa na Newroze biba Newroza azadîya şarê kurdî û yewîya demokratîke. Wa na Newroze biba cewabê şarê kurdî. Warê Newroze, yewîya şarê kurdî Amed ra heta Hewlêrî, Kirmaşan ra heta Qamişlo. Ma do vajê yewî, yewî, yewî. Ma vanê dem demê yewîya neteweyîya kurdan o. Newroz ma rê vano yewîye hêz o. Eya, ewro no mesaj çar parçeyan ra vîyareno. Adirê Newroze emser beno meşaleya haştîye. 30 serrî verê, Birêz Abdullah Ocalanî na meşale veşnaye. Ma zî ewro ra pey na meşala berz kenê. Ma venga heme şarê xo danê, berê ma adirê Newroze berz bikerê. Bi yew vengî, ma vanê azadî, haştî û aramî.”
