Adirê Newroze bi sloganê “Newroza Azadîye û Yewîya Demokratîke” Ebex û Bêgirî de ame kerdene. Hemsereka DBP’yî Wanî Gonul Uzunay pîrozbayî de qisey kerd û vat: “Senî ke Kawayê Hesînkar hemverê zaliman sere berz kerd, Kawayê Hemdem zindanî de sere berz kerd, Rahşanan sere wedarna ma zî bi eyn ruhî Newroza emserr ya Wanî pîroz kerd.”
Qezayanê Ebex û Bêgirî yê Wanî bi pêşengîya Platformê Sazgehan Demokratîk bi sloganê, “Newroza Azadîye û Demokrasî” adirê Newroze ame wekerdene. Welatijanê Ebex û Bêgirî bi cilanê xo yê neteweyî herikîyenê qadê pîrozbayî û Newroza Demokrasî û Azadîye bi govend û deyîran pîroz kerd.
EBEX
Newroze qezaya Ebexî de vernîya awanîya Rêxistina Qeza ya DEM Partî de ameye pîrozkerdene. Parlamenterê DEM Partî yê Wanî Zulkuf Uçar, Hemşaredara Wanî ya Şaristanê Girdî Neslîhan Şedal, Hemserekê DBP’yî yê Wanî Veysî Dîlekçî, Endam û Rayberê DEM Partî yê qeza û xeylê wrlatijî beşdarê pîrozbayîya Newroze bîyê. Program bi rêzgirewtişê seba cangorîyanê ke têkoşînê azadîye û demokrasî de cuya xo vîndî kerda, dest pêkerd.
Veysî Dîlekçî Newroza welatijan pîroz kerd û vat: “Ma hêvîdar ê ke Newroze biba wesîleyê aştî û azadîye, biba wesîleyê azadîya fîzîkî ya Rayberê Şarê Kurdî Abdullah Ocalanî.”
BÊGIRÎ
Newroza Qezaya Bêgirî bi pêşengîya Platformê Sazgehanê Demokratîk vernîya awanîya DEM Partî ya qeza de ameye pîrozkerdene. Hemsereka DBP’yî ya Wanî Gonul Uzunay, Hemsereka DEM Partî ya Wanî Gulşen Kurt, Hemşaredarê Wanî yê Şaristanê Girdî Abdullah Zeydan, endam û rayberê DEM Partî yê qeza û xeylê welatijî beşdarê pîrozbayîya Newroze bîyê.
‘Şarê kurd do bi yewîya xo heme heqanê xo bigîro’
Gonul Uzunay Newroza şarê Bêgirî pîrozkerd. Gonul Uzunay bale ant şerê mabênê Amerîka-Îsraîl û Îranî ser o û nê çîyî vatê: “Şexsê Rojava de waşt ke destkewteyanê kurdan binfînê. Bi şero ke Îran de yeno kerdene wazenê kurdan binfînê. Na rewşe de ma Newroze pîroz kenê. Bi Rojava yewîya şarê kurdî ameye ca. Rojhelat de zî mabênê partîyanê kurd de yewîye ameye eşkerakerdene. Şarê kurd do bi yewîya xo heme heqanê xo bigîro.”
‘Vengdayîşê Rayber Apo reyde do çareserîya meseleyê kurdî bêra ca’
Gonul Uzunay dewamê qiseykerdişê xo de dîyar kerd ke şarê kurd seba estbîyayîşê xo xover dano û wina domna: “Senî ke Kawayê Hesinkar hemverê zaliman de ser wederna, Kawayê Hemdemî zî zindan de sere wedarna, Rahşanan sere berz kerd, ma zî i nê ruhî Newroza emserrî ya Wanî pîroz kenê. Na Newroze, Newroza wayîrvejîyayîşê vengdayîşê birêz Abdullah Ocalanî ya, wayîrvejîyayîşê kurdbîyayîşê ma yo, wayîrvejîyayîşê aştî û azadîye yo. Ma heme şarê xo silaynenê Newroza Wanî ya ke do 22ê adare de bêra kerdene. Biciwîyo Newroze, biciwîyo Newroze.”
‘Ruho ke Rojava de bi gêsanê cinîyan vejîya orte kurdî dayê şinasnayene’
Dima ra Abdullah Zeydanî dest bi qiseykerdişî kerd û xoverdayîşê şarê Bêgirî silam kerd û vat: “Şarê Bêgirî hemverê heme zilm û neheqîyan her tim xover dayo. Demo ke şare ma yewîya xo bîyaro ca do xo heme dinya rê bido qebulkerdene. Riho ke Rojava de bi gêsanê cinîyan vejîya orte pêroyê dinya ra vila bi û kurdî dayê naskerdene.”
‘Hêrişî ke paradîgmaya ma ser o yê, hêrişê estbîyayîşê cinîyan ser o yê’
Abdullah Zeydan dewamê qiseykerdişê xo de bale ant hêrişanê Rayberê Şarê Kurdî Abdullah Ocalanî ser o û vat: “Ê ke heta nika seba şarê kurdî tu çîyî nêkerdo û bi netewe-dewletan wirzenê, hêrişê şarê kurdî û Abdullah Ocalanî kenê. La ma zî şarê ma zî baş zano ke nê rayîrî de kam çi bedêl dayo kamî se kerdo. Hêrişî ke paradîgmaya ma ser o yê, hêrişê vera estbîyayîşê cinîyan ê.”
‘Rojhelat de çareserî rayîro hîrêyîn o’
Abdullah Zeydanî tewr peyên bale ant şerê Îranî ser o û qiseykerdişê xo wina qedêna: “Ma ne Amerîka reyde ne zî Îran reyde yê. Rayîrêko hîrêyin est o ke ma do goreyê ey têbigêrê. No rayîro hîrêyim seba şaranê Îranî lazim o.”
Pîrozbayîya Newroze bi slogan, deyîr û girewtişê govende qedîya.
