Vizêr şewe kampê Haşdî Şabî yê şaristanê Babîl, Nînova, Embar û Kerkûk ameyê bombabaran kerdene. Netîceyê hêrişan de 36 endamê hêzê Haşdî Şabî ameyê kiştene û 13ê ci zî birîndar bîyê.
Şerê Îran û Amerîka-Îsraîlî bi di hewte ke dewam keno û çiqas şino şer çetin û hîrayêr beno. Tena vizêrî şaristanê Embar, Nînova, Babîl û Kerkûk de zaf reyan hêrişê kampanê hêzanê Haşdî Şabî ame kerdene û netîceyê hêrişan de merg û birîndarî bîyê. Hêrişî kamcîn het ra ameyê kerdene nêame zanayene.
Lîwaya 19. ê Haşdî Şabî ra 30 kesî ameyê kiştene
Vizêrî şaristanokê Qaîme yê girêdayê şaristanê Enbar, Lîwaya 19. yê Haşdî Şabî ame hedefgirewtene. Netîce de 30 endamê hêzanê Haşdî Şabî ameyê kiştene û birîndarî virazîyayê. La Amerîka û Îsraîlî heta nika sey fermî hêrişî nêgirewtê xo ser. Nê kampê Haşdî Şabî ke nêzdîyê teyaragehê mîyanneteweyî yê Qaîme yê û 400 km nêzdîyê vakurê rojava yê Bexdadî badê hêrişan bi temamî rijîya.
Vizêrî reyna hêrişê kampê Haşdî şabî yê şaristanê Babilî ame kerdene. Goreyê dîmenanê ke ameyê vilakerdene, teqayîşêko girs bîyo û dumanêk zaf zêde kewto kampê ser. La heta nika derheqê zerar û zîyanê can û malî de tu agahî nêameyê girewtene.
Nînova û Kerkûk de 6 kesî ameyê kiştene û 16 kesî zî birîndar bîyê
Reyna vizêrî hêrişê serê kampê Haşdî Şabî yê şaristanê Nînova ameyê bombabarankerdene. Netîceyê nê hêrişan de 2 endamê Haşdî Şabî ameyê kiştene û 3ê ci zî birîndar bîyê. Sewbîna zî nêmeyê şewa bînê taxa Bedir ya girêdayeyê şaristanê Kerkûkî de zî hêrişê kampê Haşdî Şabî (Tirkmen) ame kerdene. Netîce de 4 çekdarî ameyê kiştene û 13 çekdarî zî birîndar bîyê.
