Hemverfeka DEM Partî Ayşegul Dogan vat ke ganî Abdullah Ocalan wayîrê şertanê cuye, xebate û têkilîya azade bibo.
Dogan kombîyayîşê çapemenî yê merkezê pêroyî de derheqê kombîyayîşê MYK’yî û hedîseyanê rojevî de qisey kerd.
Dogan darbeya 12ê adara 1971î, Komkiştişê Gazîyî û Komkiştişê Qamişloyî de ê kesê ke merdê,yad kerdê û vat ke Tirkîya û herême de hema darbe û komkiştişan reyde rîbirîameyîş nêbîyo. Dogan eynê wextî de rojnameger Nazim Babaoglu ke 12ê adara 1994î de Sêweregi de kar ser o ame kiştene zî yad kerd û vat ke hema tu kes nêameyo muhakemekerdene.
‘Têkoşînê ey o demokrasî û azadîye herinda xo verdaye’
Dogan Salih Muslim o ke nêweşxane de rîyê kêmanîya gurçikan ra cuya xo ra bi, ey zî yad kerd û vat: “Ma behsê nameyêko pêşeng kenê ke sîyasetê kurdan de herinda xo verdaya. Ez nameyê partîya ma ser o embaza ey a têkoşînî û cenîya ey Ayşe Efendî, şarê kurd, şarê Rojava û Sûrîye rê serweşî wazena.”
‘Çîyê ke Îran de qewimîyenê tena Îranî eleqedar nêkenê’
Dogan vat ke şero ke Rojhelatê Mîyanênî de xorîn beno tena Îranî nê heme Rojhelatê Mîyanênî û dinya ser o tesîr keno û vat: “Îran dewletanê tewr zordar ê herême û dinya ra yew a. Bi des serran o cinîyî, sosyalîstî, kedkarî, grûbê bawerîyê cîyayan, kêmanîyî, nê rejîmê ceberutî ra zaf zilm dî. La tu çî ganî nêbo sebebê mudaxaleyêko winasîn.”
‘Êdî ganî vîyarîyo daraxê viraştişê qanûnan’
Dogan derheqê Prosesê Aştî û Komelê Demokratîkî de vat: “Qonaxo ke ma resayê êdî qonaxêko ke ganî serûberkerdişê huqûqî û qanûnî bêrê qiseykerdene. Tepşê komelkîye êdî ver bi nê qonaxê serûberkerdişê qanûnî şîyayîş o û taqwîmkerdişê ci yo û no ganî nêro taloqkerdiş.”
‘Gamê ke paweyê serûberkerdişê qanûnî lazim nêkenê est ê’
Dogan vat: “Qerarê MHME’î şênê bêrê caardene. Qerarê Mehkemaya Qanûnî şênê bêrê caardene. Serûberkerdişê seba azadkerdişê girewteyanê sîyasîyan seba çi nêyeno kerdene? Girewteyê nêweşê giranî seba çi hema zî hepisxane de yê? Hemserekê ma yê verênî Selahattîn Demîrtaş, Fîgen Yuksekdag û girewteyê bîn ê dosyaya Kobanî ganî vejîyê, qerarê MHME’î bêrê caardene. Nê gamî demokrasîyê Tirkîya rê destkewtiş nîyê? Bi milyonan merdimî pawenê ke nê qerarî bêrê caardene.”
‘Hamleyanê ke ma şinasnê’
Dogan eynê wextî de vat ke muhakemekerdişê Îmamogluyî ke bi mîlyonan rayan weçînîyayo mudaxeleyê demokrasî û hewlê tasfîyekerdişê muxalefetî yo û vat: “Ma nê hamleyan zaf rind şinasnê. La êdî ganî êdî no bibedilîyo û bibo demokrasî, huqûq, edalet û warêko ke her kes seypê muamele vîneno.”
‘Ganî Birêz Ocalan wayîrê şertanê azad bo’
Dogan derheqê statuyê Ocalanî de vat: “Ma sey DEM Partî 2024î ra heta nika vanê ke şertê tecrîdê giranî û bêtêkilîyaa mutlaqe formêko îşkenceyî yo û binpaykerdişê heqê bingehên ê merdimîye yo. 27 serrî yo ke na rewşe dewam kena û ganî êdî biqedîya. Nê wextê mîyan de Birêz Ocalanî ra esasen di mesaj ameyê. Heme nê qonaxê krîtîkan ra Tirkîya bi rengêkê vîyart. La ma her wext vat: Ganî Birêz Ocalan wayîrê şertanê cuya azade, xebata azade û têkilîya azade de bibo.”
