Torra Heqanê Merdiman eşkera kerd ke rewşa hepisxaneyan Îran û Rojhelat de zaf xirab a û da zanayene ke zereyê hepisxaneyan de hêzêko zêde ameyo bi ca kerdene.
Torra Heqanê Merdiman ê Kurdîstanî derheqê rewşa sîyasî yê hepisxaneyanê Îran û rojhelatê Kurdîstanî de agahî pare kerde. Goreyê rêxistine ra destpêkê şerê mabênê Îsraîlî û Îranî de, keyeyî nêeşkenê gedeyanê xo yê girewteyan bivînê, girewteyî heqanê xo ra ameyê bêparkerdene û rayîr nêdanê girewteyê nêweşî zî bêrê tedawîkerdene.
Eynî çimeyî nê çîyî eşkera kerdî “Berpirsî rayîr nêdanê girewteyan ke şorê hepisxaneyêk binî, hewceyî zafê girewteyan bi tedawî est a, la nêyene dermankerdene. Girewteyê sîyasî yê hepisxaneyanê Urmîye, Mahabad, Mîyandwaw, Seqiz, Sine, Kirmanşan û Îlam, semedê şerî heqanê xo ra ameye bêpar verdayene. Coka werdê girewteyan ameyo kemîkerdene. Nêzdîyê 150 girewteyan nerazîbîyayîş dayo mojnayene, seba ke hepisxaneyê Mahabadî ra berdê hepixaneyê Mîyandwaw.”
Tewr peynî de ame vatene, “Badê banê polîsan yê şaristanê Urmîye de ame bombabarankerdene, bi seyan endamanê hêzanê taybetî yê Îranî dorûverê banî girewto merkezê Urmîye de kom bîyê û bi şewan zî zereyê hewşê hepisxaneyî de manenê.”
