KCK’yî ê kesê ke Başûrê Kurdîstanî de Helebçe de cuya xo ra bîyî ardî vîrî û zîhnîyetê kiştoxî şermizar kerd.
Hemserekîya Konseya Rayraberdişî ya KCK’yî, serrgêra hêrişê kîmyewî de ke 16ê adare 1988î de Başûrê Kurdîstanî de şaristanê Helebçe de hetê rejîmê Seddam Huseyînî ra ameyo kerdene, eşkerayîyêk weşanaye û komkiştişî de êyê ke merdî, bi hurmet ard vîrî.
KCK’yî eşkerayîya xo de vat: “Bi dej û hêrsêko gird serrgêra Qirkerdişê Helebçe ke yeno ciwîyayene ke ma vîr ra nêşino. Qirkerdişê Helebce ke vera kurdan ameyo kerdene û qirkerdişanê tewr bêrehman ê tarîxê merdimîye ra yew o û nê komkiştişî de êyê ke merdî, ma bi hurmet vîrî anê. Kiştoxê ke Komkiştişê Helebce kerd ke exlaq, wîjdan û merdimîye ra nesîbê înan çin o û zîhnîyetê înan ê jenosîdkarî bi şîder ma şermizar kenê. Şarê kurdan sere de Komkiştişê Helepçe, qirkerdişê ke tecrube kerdê tu wext xo vîr ra nêkeno, bi têkoşînê estbîyayîş û azadîye do zîhnîyetê qirkerdişan ra hesabê tarîxî bipersê.”
KCK dewamê eşkerayîya xo de vat: “Komkiştişê Helebçe prosesêk de ke Têkoşînê Azadîya Kurdîstanî xurt bîyêne, seba ke vernîya hişyarbîyayîş û wirzîyayîşê şarê kurdan ê vera rejîmanê kolonîyalîstan bigîrîyo ameyê kerdene. Nê dewrî de bi eynê amancî parçeyê Kurdîstanî yê bînan de zî komkiştişî ameyê kerdene. Labelê nê komkiştişî nêresayê amancê xo. Şarê kurdan bi serkewtişê têkoşînê estbîyayîşî vernîya serkewtişê qirkerdoxan girewt. Bi komkiştişan waştêne ke hişyarbîyayîşê şarê kurdan bêro vindertene la encamêko eksê ey de vejîya, şarê kurdan bi têkoşînê vera komkiştişan şûurê xo yê neteweyî û rêxistinbîyayîşê xo hîna zî xurt kerd û sîyasetê înkarî şikit.”
KCK’yî wina domna: “Vîyarte de şarê ma têkoşînê estbîyayîşî kerdêne, ewro seba çareserîya meseleya azadîye têkoşîn keno. Labelê talûkeyê komkiştişî nê dewrî de zî est o. Şêxmeqsûd û Rojava de no tehluke tecrube bîye. Şarê ma çar parçeyanê Kurdîstan û teberê welatî de bi serewedartişêko gird vernîya komkiştişan girewt ke Rojavayê Kurdîstanî ser waştêne bêro kerdene.
Sewbîna 16ê adare 1978î de Qirkerdişê Beyazîtî û 7 wendekaranê şorişgerî ke ameyê kiştene, 12ê adare 2004î de Qirkerdişê Qamişlo û 12ê adare 1995î de Qirkerdişê Gazî zî bi hurmet anê xo vîrî. Ma bawer kenê ke bi fehmê miletê demokratîkî û stratejîya têkoşînê hemparî şarê ma do hesabê tarîxî yê heme qirkerdişan teqez biperso.”
