Qeçeko 8 rojin ra heta maya 42 serra, 6 endamê keyeyê Davut Elgunî şewêk de ameyî qetilkerdene. Pî Davut Elguno ke nê qirkerdişî ra weş mendo, rixmo ke dewa ameya padayene zî seba edaletî têkoşîn keno.
1993î de dewa Xirabreşkî ya Cizîra Şirnexî de tarîxê Kurdîstanî de hedîseyanê tewr hovaneyan ra yew qewimîya. Hêzanê paramîlîteran ê ke sey kontrgerîlla ameybî namekerdene, eşt keyeyê Elgunî ser. Nê hêrişî de Nesîbe Elguna 42 serra reyde gedeyê aye Lokman, Hidir, Nezîr, Hacer û qeçeko 8 rojin Murat Elgun bi gulebaranî ameyî qetilkerdene. Herindê na şewe hema zî ê keyeyî de gandar ê.
Pîyo ke keyeyê ey şewêk de ame qetilkerdene
Na şewe tena pî Davut Elgun weş mendo. Çike o seba vînayîşê kênaya xo ya zewicîyaye şibidewa bîne. Dimayê na hedîse seba ey cuyêka pirrê dej, derd û kul dest pêkerd. Wexto ke agêrayî dewe, rastîya qirkerdişî reydde rî bi rî mend, cuya ey bi temamî ameye bedilanyene.
Tehdîtê leşkerî yê dimayê qirkerdişî
Dimayê qirkerdişî, Davut Elgun raste teda û tehdîtan ame. Goreyê vatişê Elgunî, leşkerê bi nameyê Serdarî bi hawayêko eşkera qebul kerdo ke ey bi xo fermanê nê qirkerdişî dayo û ey tehdît kerdo ke wa bêveng bimano.
‘Dozgeran vat PKKyî sucdar bike’
Dozgeranê ê wextî waşt ke hedîse rastîya ci ra dûrî fînê. Înan tedaya Davut Elgunî kerda ke o PKKyî sucdar biko seba ke rastîyî bêrê nimnayene. Labelê Elgunî nê waştişê red kerd û waşt ke sucdarê rasteqînî bêrê eşkerakerdene.
Bi eyn manayî reyêka bîne eyn qerar vejîya
Çarçewaya cipersayîşanê serranê 90î de babeta kesanê vîndîbîyayeyan û qetilkerdişanê ke faîlê înan dîyar nîyê, problemanê tewr xorîn ê huqûqê Tirkîya ra yew o. Na dosya de zî bi manayê “vîyartişê wextî” dewa hetê mehkemaya Şirnexî ra ameye padayene. Bi nê hawayî faîlê ke ganî bêrê muhakemekerdene, ameyî pawitiş.
Birîna ke bi vîyartişê wextî nêbena weş
Nê dewayî mojnenî ke sîstemê edaletî tê Tirkîya herêma Kurdîstanî de rêbazê bêzaverdayîşî kerdî pratîkêko fermî. Heta ke nê dosyayê padîyayeyî nêrê akerdiş, kesê ke nê fermanî dayê nêrê bicezakerdiş, dejê keyeyanê qurbanan qet weş nêbenî. Davut Elguno 80 serre ewro zî vernîya keyeyê xo de, vîrameyîşanê xo yê bidej reyde tena mendo.
