Federasyonê Gazîyan bi eşkerayîyêk hêzanê ke qirkerdişê Helepçe viraşto, şermezar kerdê û qurbanê qirkerdişî yad kerdê. Eşkerayî de sozê caardişê xeyalanê şehîdanê Helepçe ame dayene.
Federasyonê Gazîyanê Vakur û Rojhelatê Sûrîye (FGBRS) bi munasebetê serrgêra 38. a qirkerdişê Helepçe de eşkarayîyêka nuştekî daye. Eşkerayî de ame vîr vistene ke şarê kurdî bi serran seba cuyêka birûmete têkoşîn dano û wina ame vatene: “Şarê kurdî rastê zaf qirkerdiş, koçberî û tedayan giranan ame. Înan ra yew zî Qirkerdişê Helepçe yo. 16ê adare 1988 de hêzanê rejîmê Baasê Îraqî vera şarê Helepçe yê başûrê Kurdîstanî bi çekanê kîmyewî hêrişêko tewr xirab û wehşî viraşt. Netîceyê nê hêrişî de mabênê înan de gedeyî, cinî, kal û pîrî zî est bî, bi hezaran kurdî şehîd û birîndar bîyê.”
‘Sîstem vera qirkerdişî bêveng mend’
Ekerayî de ame dîyar kerdene ke hêriş û qirkerdiş do tu wext vîrê komelî yê şarê kurdî û merdimîya azadîwaze de nêro vîr ra kerdene û sey yew lekeyo tewr sîya yê tarîxî de bimano. Eşkerayî de nê çî ameyê îfade kerdene: “Vera nê wehşetî hêzê goya ke seba heqanê merdiman têkoşîn danê tersê sîstemê serdestî yê serê gonîya merdiman weyî benê, bêveng mendî. Hezê herême yê serê çinkerdiş û înkarê kurdan de wayîrê eynî fikrîyê zî vera na trajedî seba merdimîye şermêke gird a, çimê xo girewtî.
‘Qirkerdiş nêeşka têkoşînê azadîye asteng bikero’
Eşkerayî de ame vîr vistene ke vera hêriş û qirkerdişan zî heme parçeyanê Kurdîstanî de têkoşîn û hêvîya azadî yê şarê kurdî nêvindert û nê nuqtayî ameyê dîyarkerdene: “Rayber Apo, seba şarê kurdî reyna rastê jenosîd û qirkerdişan nêro têkoşînêko tewr birûmete aver berd û do aver beno. Şarê kurdî ewro heme cayanê ke tede yo serê esasê fikir û felsefeyê Rayber Apoyî xo rêxistin keno û yewîya xo xurt keno. Ma sey gazîyanê şer, qirkerdişê Helepçe ke keweno serra 38î bişîdet şermezar kenê. Ma keyeyanê şehîdanê qirkerdişê Helepçe rê reyna serweşî wazenê. Sewbîna zî gazî û birîndaranê Helepçe rê zî ma şîfaya bilez wazenê.”
‘Ma do xeyalanê şehîdan bi ca bîyarê’
Eşkerayî wina qedîyaye: “Bi piştîpêdayîş û yewîye ewro Rojavayê Kurdîstanî şênber bîyo, ma do teqez welatêko azad û hêvî û xeyalanê heme şehîdan û birîndaran bîyarê ca. Do pêroyî dej û janê ma serê herra azade de bibê amênê rojanê azad û rindek.”
