Hukmatê Afganîstanî bi eşkerayîyêk dîyar kerd ke Pakîstanî merkezêke Kabîlî yê sivîlî tede mendêne bombabaran kerdo û netîceyê bombabaranî de 400 kesî cuya xo ra bîyê.
Şerê mabênê Pakîstan û Afganîstanî de bi hêrişanê neweyan dewam keno. Şewa bînê paytext Kabîl de teqayîşêk gird qewimîya. Verfekê Hukmatê Afganîstanî Zebîhullah Mucahîd dîyar kerd ke teyaranê şerî yê Pakîstanî beşêke milê weşîye yê merkezêke rehabîlîtasyonî yê madeyê hişberî yê paytextê Kabîlî bombabaran kerd û netîceyê bombabaranî de 400 sivîlî ameyê kiştene. Mucahîd sewbîna zî dîyar kerd ke 250 kesî zî birîndar bîyê. Mucahîdî hêrişê Pakistanî hişkî şermezar kerd û wina vat: “No hêriş sûcê şerî û kerdişêk nemerdî yo. Berpirsê Hêzanê Ewleyî Umut Stanîkzaî zî eşkera kerd ke badê hesnayîşê vengê teyaranê şerî vengê teqayîşêko girs ame hesnayene û dimayê teqayîşê girsî veşayîş vejîya.
Pakîstan: Ma da kampê şerî ro
Pakîstanî hêrişê şerî qebûl kerd la eynî eşkerayî de îdia kerd ke teyarayanê înan yê şerî warê sivîlan ney la kampê leşkerî pirodayê. Şerê Pakîstan û Afganîstanî 26ê sibate 2026î ra nat dewam keno. Goreyê hûmara Neteweyanê Yewbîyayeyan nê şerî de 75 sivîlî ameyê kişştene û 115 hezar kesî zî ca û warê xo ra ameyê koçkerdene.
