Şaristanê Bannu yê vakurrojawanê Pakîstanî de, bi wesayîtêk bombabarkerde hêriş ame kerdene. Hêriş de 12 polîsî cuya xo ra bîyê, xeylê kesî zî birîndar bîyê.
Goreyê çimeyê polîsanê herême ra ameyê girewtene roja şemeyî taxa Fatîh Hel a Bannuyî de vera nuqtayêka polîsan hêriş ame kerdene. Badê ke hêrişê întîharî ke bi wesayîtê bombabarkerdeyî nuqtaya kontrolî hedefgirewte, milîtananê çekdaran eşt serê qereqole.
Rayedarê polîsanê Bannuyî ra Muhammed Sacîd Han dîyar kerd ke hêriş de 12 wezîfedarê asayîşî ameyê kiştene, polîsêke vîndî yo. Rayedarê ke Reutersî rê qisey kerd ard ziwan wextê hedîse de herême de dorê 15 polîsî bîbî.
Badê hêrişî hêzê asayîşî û tîmê weşîye ver bi herême ameyê neqlkerdene. Ame eşkerakerdene ke milîtanan pusu eşta vernîya hêzanê asayîşî. Badê ke birîndarî berdê nêweşxaneyê dewlete yê Bannuyî rewşa awarte ameye îlankerdene.
Çimeyê polîsan îdia kerd ke hêriş de drone zî ameyo şuxulnayene. Ame zanayene ke rêxistina Harakat-ul Mujahîdîn ê girêdayê El Qaîde berpirsyarî hêrişî girewte xo ser.
Fikarî zêde bîyê ke hêriş problemê ke mabênê Pakîstan û Afganîstanî de newe ra gird bikero. Rayberîya Îslamabadî demêko derg o îdia keno ke grûbê çekdarî yê Afganîstanî hêrişê herdê Pakîstanî kenê. Rayberîya Talîbanî zî nê sucdarîyan red kenê.
