Komîteya Amadekar a Newroza Amedî eşkerayî daye û nê vengdayîşî kerd: “ Ma heme şarê xo ke seba têduştî û azadîye xebitîyeno, seba xurtkerdişê yewîye, azadîye, demokrasî û têduştîye silaynenê Meydanê Newroze yê Amedî.”
Hemsereka DEM Partî ya Amedî Gulşen Ozer vat: “Newroze tarîxê xoverdayîşê kurdan de cayêko muhîm gêna. Ma heme şarê xo silaynenê Newroza azadî û aştîye.”
Hemserekê DBP’yî yê Amedî Ahmet Doganî vat: “Rojhelatê Mîyanênî de rewşa şerî est a. Paradîgmaya Birêz Ocalanî seba ke vernîya nê şerî bêro girewtene cayêko muhîm gêna. Rojava de rewşa ke vejîyaye, aye ra pey hêrişê paradîgmaya Birêz Ocalanî ser o ameyî. Nika Rojhelat de her kes paradîgmaya Birêz Ocalanî sey rayîrê xelisîyayîşî vîneno. Na Newroze do biba Newroza azadîya Birêz Ocalanî.”
Eşkerayîya Komîteya Newroze de ame wina vatene: “Şarê Rojhelatê Mîyanênî û kurdî, bi seserran o vera sîyasetê înkar û çinkerdişî yê. Hêrişê tewr dergî Rojava de qewimîyayê. Şarê Rojava destkewtişê xo girewtê û bi qerardarîyêka girde ê pawitî.
Tirkîya de zî prosesêko tarîxî dewam keno. Prosesê Aştî û Komelê Demokratîkî ke Rayberê Şarê Kurdî Abdullah Ocalan 27ê sibata 2025î de da destpêkerdene, ewro mesafeyêka muhîme kerd. Seba ma o krîtîk o yo ke xeta têkoşînî ke na berpirsîyarîya tarîxî ke Birêz Ocalanî girewta xo milî asanêr bikerê, xurt bikerê. Sermuzakerekerdoxê prosesê vurîyayîşê demokratîkî Birêz Ocalanî şertanê ci rindkerdiş, hem ma rê hem şaran rê waştişêko ke bê ney nêbeno.
21ê adare de Amed de ma bi beşdarîya mîlyonan Newroze pîroz kenê. Eynî wext de ma bawer ê ke na Newroze do biba wesarê hempar ê şarê kurdî. Çar parçeyanê Kurdîstanî de bi ruhê yewbîyayîşê neteweyî Newroze do bêra pîrozkerdene.”
Komîteye peynîye de vat: “Ma veng danê cinî û ciwan û heme şaran ke tewr vernî de govenda azadîye gird bikerê. Bi ruhê netewê demokratîk û yewbîyayîşî ma veng danê ke cuya azade ya şarê kurdî girs bikerê. Ma heme şarê xo ke seypêyî û azadîye paweno, silaynenê Meydanê Newroza Amedî.”
