Amed – Dayîkê Aştî ke bi serran o seba gedeyanê xo xover danê, waşt ke dewlete bilez gamanê laziman bierza û wina vat: “Heta ke Serek Apo azad nêbo, aştîyêka domdare nêqewimîyena.”
Prosesê “Aştî û Komelê Demokratîkî” ke Rayberê Şarê Kurdî Abdullah Ocalanî 27ê sibata 2025î de dayo destpêkeredene, dewam keno. Rixmo ke Têgêrayîşê Azadîya Kurdî û Abdullah Ocalan nê serr û nêmî de zaf gamî eştî zî dewlete awankerdişê Komîsyona Meclîsî de tu gamî nêeştî û prosesî hêdî rayra beno. Yeno vatene ke verê meclîs şêro tetîl, dewlete do derheqê prosesî de qanûnê çarçewa viraza. Na babete de şarî zî paweyê gaman o û komel wazeno dewlete bilez gamanê laziman bierza. Dayîkê Aştî û dayîkê ke gedeyanê xo têkoşînê azadîya Kurdîstanî de vîndî kerd, derheqê prosesî de ajansê ma rê qisey kerdî.
‘Heme çî ra azadîya Serekê xo wazenê’
Dayîka bi nameyê Makbule Ozbek dîyar kerd ke rixmo ke zaf dejî antê zî aştî wazena û vat: “Panc-şeş şehîdê keyeyê ma est ê. Reyna zî ez aştî wazena. Aştî û aramî hem dano kurdan hem tirkan, dano her kesî. Verê her çî ma azadîya Serekê xo wazenî. Wa dewlete gaman bierza, girewteyanê nêweşan verada û vat: “Mîmarê nê prosesî Serekê ma yo. Heta Serekê ma nêvejîyo û şarî reyde dayîşûgirewtiş nêkero, aştî nêbena.”
‘Heta Rayberê Şarê Kurdî azad nêbo aştî nêbena’
Dayîka Aştî Meyrem Turan zî îfade kerd ke hema zî dewleta tirkan gamêka şênbere nêeşta û vat: “Heta ke Serekê Şarê Kurdî azad nêbo, tu kes azad nêbeno. Seba ke gonîya tu kesî û hêsirê çimanê dayîkan êdî nêrijî, ganî merdim çi destê ci ra yeno, bikero. Ma seba aştîyêka domdare destê xo dergê temamê dinya kenî.”
‘Ma bi hawayêko demokratîk waştişê heqanê xo kenê’
Dayîka bi nameyê Menîce Yenî zî wina vat: “Zerrîya mi veşaye, wa zerrîya tu dayîkanê bînan nêveşa. No serrêk û şeş aşmî yo prosesêk dest pêkerdo, Serekê ma şerê çekdarî da vindarnayene. Ma vanî bi hawayêko demokratîk ma şêrî serê masa, nê problemanê xo pîya çareser bîkerî. Ma waştişê heqanê xo, erdê xo û ziwanê xo kenî.”
Peynî de Guler Sevîkteka ke gedeyê aye teber de yê, vat: “Aştî nêba ma keyeyê xo de rehet nîyê. Nika di serrî yo proses dest pêkerdo, şer û cenazeyî nêmendî. Waştişê ma her tem têduştî yo.”
