Komîteya Mîyanneteweyî ya Pêdîyayayîşê Abdullah Ocalanî û Pawitişê “Heqê Hêvîye” bi waştişê ke tecrîdê Rayberê Şarê Kurd Abdullah Ocalanî lez bêro hewanayene û “Heqê Hêvîye” bêro caardene kampanyaya îmzayan a mîyanneteweyî da destpêkerdene.
Kampanyaya ke sîyasetmedar, akademîsyen, roşnvîr û hunermendê welatan ê cîya-cîyayan tede est ê demêko kilm de 500 ra vêşêr îmzayan ra vîyarte. Komîte bi nê piştîdayîşê xurtî waştişê xo resna raya mîyanneteweyî û sazgehan.
Îmrali sembolê tecrîdî yo
Komîte ard vîrî ke Rayber Apo 15ê sibate 1999î ra Îmrali de tepîşte yo û vat ke na rewşe tena tepîşteyîye nîya; “hewanayîşê sîstematîk ê îmkanê hêvîye, dîyalog û vurîyayîşî” ya. Îmrali êdî tena hepisxane nîyo, bîyo sembolê binpaykerdişê “Heqê Hêvîye.”
Komîte bi nîşandayîşê qeraranê Dadgeha Heqanê Merdimîye ya Ewropa û mekanîzmeyê heqê merdimîye yê mîyanneteweyîyan vat ke “Heqê Hêvîye” heqo universal o û tu dewlete nêşêna merdimêk hêvîya azadîye, dîyalog û îmkananê nirxnayîşan ê neweyan ê qederê ci ra mehrum bikera.
Waştişê komîte
Komîte waştişê xo hîrê sernuşteyan de arê dayî:
Tecrîdê Rayber Apoyî lez bêro hewanayene û şertê vînayîşê keyeyê ci, avukatanê ci û heyetanê mîyanneteweyîyan bêrê temînkerdene.
Herême de seba haştî û pîyaciwîyayîşî prosesêko dîyalogî yo raştikên, biedalet û mende dest pêbikero.
Sazgehê mîyanneteweyî bêvengîya xo biqedênê û gamê şênber û qerardarî bierzê.
Komîte vat ke nê gamî tena hewceyîya huqûqîye nîya, eynî wext de hewceyîya tarîxî û sîyasîye zî ya.
Komîte vat ke temamkerdişê tecrîdê Îmralî seba şikitişê çerxa şîdetî û newe ra awankerdişê bawerîya mîyanê şaran de krîtîk o. Kampanyaya îmzayan do sere de Yewbîyayîşê Ewropa û Neteweyê Yewbîyayeyî sazgehanê mîyanneteweyî yê eleqedaran rê bêrê pêşkêşkerdene.
Kampanya îmzayan serê nê lînkî de dewam kena: https://www.change.org/p/support-visit-and-freedom-for-abdullah-%C3%B6calan-realization-of-the-right-of-hope?utm_medium=custom_url&utm_source=share_petition&recruited_by_id=f87143f0-a099-0130-edd3-3c764e04dd47
