Hemsereka Daîreya Têkilîyanê Teberî ya Îdareyê Xoserî Îlham Ehmed Newroza Amedî rê mesajêko bivîdeo şawit.
Îlham Ehmed mesajê xo de vat: “Qamişloyî ra heta Amed, Hewlêr û Mehabadî Newroza heme kesan pîroz bo. Rojawan de prosesê şorişî de serrê zehmetî vîyartî. Çar parçeyanê Kurdîstanî ra bi xoverdayîş û piştîdayîşê heme kurdan destkewtişê muhîmî girewtî. Ma waştêne bi destkewtişanê hîna girdan, bi qanûnan, bi fermî, nê prosesî tacîdar bikerê. Çi heyf ke ma prosesê hîna giranî tecrube kerdî. La reyna ma dî ke nê prosesanê giranan de ma tena nîyê. Heme Kurdîstanî de ma şarê xo hetê xo de û piştîya xo de dî.”
Ehmede vat: “Senî ke tarîxê kurdan de Newroze bîya xelisîyayîş û roja newîye, Newroza 2026î zî do seba şarê kurdan bibo Newroza newîye. Tirkîya de Prosesê Haştî û Komelê Demokratîkî dest pêkerd. Ma bawer kenê ke no proses do seba heqanê şarê kurdan ê Tirkîya çareserîyêka sîyasîye temîn bikero. Rojhelatê Kurdîstanî de prosesêko newe ciwîyeno, peynîya rejîmî ke bi serran kurdî darde kerdêne, nêzdî bena. Başûrê Kurdîstanî de pawitişê destkewtişan berpirsîyarîya heme kurdan a.”
Ehmede vat: “Parçeyp tewr gird ê Kurdîstanî Vakur o. Potansîyelo tewr gird Tirkîya de yo. Coka kurdî çiqas piştî bidê yewbînan û hetê yewbînan de vinderê, tarîx do hende newe ra bêro nuştene. Vakurê Kurdîstanî de prosesê sîyasî çend aver şino hende ameyoxê kurdanê parçeyanê bînan zî garantî beno. Hêzê kurdanê Vakurê Kurdîstanî hêzêko gird o, gama ke hereket bikero sey laseran herikîyeno.”
Ehmede peynîye de vat: “Fedakarîya girde û keda girde ke Rayber Apoyî nîşan dayî bi heme zerrîya xo ya safe selam kenê. Ma wazenê ke heme tepîşteyê sîyasîyî azad bibê. Newroza şima pîroz bo.”
