Hêzê leşkerî yê Îranî her ke şino bawerîya xo ya welatîyanê Îranî kêmêr bena û bi sucdarîya “casusîye” înan destbend keno û keno hepisxaneyan.
Goreyê melumatanê keyepelê Mepa Newsî heme Îran û Rojhelatê Kurdîstanî de 500î ra vêşêr welatîyê Îranî bi sucdarîya ke welatanê bînan rê “casusîye” kerda ameyê destbendkerdene û ê erşawitê hepisxaneyan. Rejîmê Îranî îdîa keno ke nê welatîyan melumatê hesas ê derheqê sazgehanê leşkerî de, cayê ke hêrişê hewayî tede bîyê û operasyonê cewabdayîşê awarte de melumat dayê servîsê îstîxbaratê xerîban û sazgehê medyaya opozîsyonî.
Hêzê leşkerî yê rejîmî nê destbendkerdişê kolektîfî sey operasyonê “emnîyeto zereyî” pênase kenê. La rêxistinê heqanê merdiman û keyeyê destbendkerdeyan eşkera kenê ke sucdarîya casusîye tersê pawitişê rejîmî yo û sucdarîyêka bêbinge ya. Keyeyî û sazgehê heqanê merdiman vanê ke her kesê ke şerî belge keno û melumatanê dinya teberî reyde pare keno, rejîm sey “casus” vîneno, destbend keno, îşkence keno û keno hepisxane.
