Newroza Hezexe ya sloganê “Azadî û Yewîya Demokratîke” bi coşêko pîl ameye pîrozkerdene. Parlamentera Wanî ya DEM Partî Gulderen Varli pîrozkerdişî de qisey kerd û vat: “Ma aştîya birûmete rê amade yê.”
Qezaya Hezex a Şirnexî de Newroza bi sloganê “Azadî û Yewîya Demokratîke” yena pîrozkerdene, rixmê varanî zî bi coşêko pîl ameye pîrozkerdene. Hemserek û rayberê partîyanê sîyasî, temsîlkarê sazgehanê sîvîl ê demokratîk û xeylê welatijî bi cil û berganê xo yê neteweyî beşdarê pîrozkerdişî bîyê. Welatijan sloganê “Bijî Serok Apo” kewtê qad. Pîrozkerdişê sirûdê Ey Reqîb reyde dest pêkerd.
Pîrozkerdiş bi wendişê mesajê Rayberê Şarê Kurdî Abdullah Ocalanî dewam kerd. Mesajî aktîvîsta TJA’yî Eylul Îmuk wend. Dima ra Hemsereka Hezexî ya DEM Partî Songul Erdem namayê Komîteya Amadekar ser o ailam da şarî û waşt Newroze biba wesîleyê azadîya fîzîkî ya Rayberê Şarê Kurdî Abdullah Ocalanî.
‘Ma seba aştîya birûmete amade yê’
Parlamentera Wanî ya DEM Partî Gulderen Varli wina vat: “Rayberê Şarê Kurdî Abdullah Ocalanî îmkanê aştî amade kerdê. Kurdan her tim aştî waşt. Wa êdî merg çin bo. Ma zerrîyaa Botanî Hezex de vanê, ma aştîya birûmete rê amade yê. Bêrê ma pîya vengê birêz Ocalanî berz bikerê.”
Rixmê varanî zî pîrozkerdiş dewam kerd
Pîrozkerdiş bi deyîranê Hozan Servan û girewtişê govendan xurt bi. Adirê Newroza het3e Dayîkanê Aştî ra ame wekerdene. Dorê adirî de girseyî govende girewte û sloganê “Bijî Serok Apo” û “Bijî Newroze” ameyê vatene. Rixmê varano ke varayene zî Pîrozkerdiş nêvindert, girewtişê govendan nêvindert. Pîrozkerdiş bi deyîranê Koma Hezex qedîya.
