Amerîka da zanayene ke Îranî reyde muzakereyê înan dewam kenê. Wezîrê Karanê Teberî yê Îranî Ebas Eraqçîyî dîyar kerd ke Washingtonî reyde muzakere nêbeno.
Her çiqas medyaya Îranî da zanayene ke Tehranî plana 15 babetan a Washingtonî ya qedênayîşê şerî red kerd zî, Amerîka îfade kerd ke muzakereyê xo yê Îranî reyde dewam kenê.
Sekretera Çapemenî ya Qesra Sipîye Carolyn Leavitt vat: “Muzakereyî dewam kenê û encam danê.” Leavitt îfade kerd ke raporanê medya yê têkilîyê plana 15 babetan a Amerîka de tayê “elementê raştîye” est ê.
Wezîrê Karanê Teberî yê Îranî Ebas Eraqçîyî eşkera vat ke mabênê Îran û DYA de tu muzakere çin o. Vat ke peyamê ke bi rayîrê mîyankaranê cîyayan yenê şawitene “manaya muzakereyî de nîyê” û nîyetê Tehranî çin o ke rasterast DYA reyde muzakere bikero.
Eraqçîyî da zanayene ke îdarekarê welatî pêşnîyazanê haştîye erjnenê û îdîa kerd ke DYA şerê vera Îranî de nêreseno hedefê xo. Vat ke mîyanê nê hedefan de hêvîya serkewtişêko leşkerî û vurîyayîşê rejîmî est ê.
Eraqçîyî rolê Amerîka yê herême rexne kerd û vat ke Washington bi estbîyayîşê xo yê leşkerîyî reyde zî nêeşkeno piştîdayoxanê xo yê Rojhelatê Mîyanênî bipawo. Veng da cîrananê Îranî ke fek Amerîka ra verdê.
