Pîrozkerdişê Newroze ya qezaya Milazgirî ya Mûşî de Parlamentera Mûşî ya DEM Partî Sumeyye Boz qisey kerd, vera gamenêeştişê dewlete yê seba bedilnayîşê şert û mercanê Rayberê Şarê Kurdî Abdullah Ocalanî reaksîyon mojna û vat: “Şarê kurdî wazeno Rayberê xo mîyanê xo de bivînê. No vengdayîş heme qadanê Newroze de berz bi.”
Qezaya Milazgirî ya Mûşî Meydanê Qeseban a Kehene bi sloganê “Newroza Azadî û Yewîya Demokratîke” Newroze ameye pîrozkerdene. Bi hezaran kesî beşdarê Newroze bîyê û pîrozkerdişî de xeylê reyan sloganê “Bijî berxwedana Rojava” û “Bijî Serok Apo” ameyê vatene. Girse bi coşêko pîl govende girewte. Newroze de Hemşaredarê Milazgirî Ahmet Kenan Turker û Parlamentera Mûşî ya DEM Partî Sumeyye Boz qisey kerd.
‘Kaînat baxçeyê şaran o’
Ahmet Kenan Turkerî dîyar kerd ke şar bi hesreta azadîye qadê Newroze pirr kerdê û hêvî kerd ke şer û pirodayîşî Rojhelatê Mîyanênî de biqedîyê. Turkerî bale ant prosesê “Aştî û Komelê Demokratîkî” ser o û wina vat: “Ez sipasîya her kesî kena ke seba aştî cehd keno û kede dano û Newroza înan pîroz kena. Westayo pîl Yaşar Kemalî vato, ‘Eke bexçeyêkî de her tim eyn vilike est ba, o baxçe weş nêbeno.’ Kaînat baxçeyê şaran o. Cîyayê ma dişmenîyê ma nîyê, zengînîya ma yê tewr pîl ê. Kurdî zî vilijanê tewr rind ê baxçeyê kaînatî yê. Wa nê vilîkî nêpilisîyê.”
‘Ganî dewlete samîmîyetê xo bimojna’
Parlameneter Sumeyye Boz zî dîyar kerd ke adirê Newroze her ca de seba aştî ameyo wekerdene û wina qisey kerd: “Newroza Milazgirî ra heta Newroza Anqara, her keso ke pawitişê aştî û azadîye keno, wayîrê vengdayîşê Rayberê Şarê Kurdî Birêz Ocalanî vejîya. Ê ke demo ke kewenê tengane û sîyasetê înan asê maneno seba çareserî şonê Îmrali ganî samîmîyet û cîdîyetê xo bimojnê. Seba ney zî ganî ‘Heqê hêvî’ bîayrê ca. Nêyeno qebulkerdene ke hetêkê prosesî binê tecrîdî de bibo û heto bîn azad bibo. Şarê kurdî wazeno Rayberê xo hetê xo de bivîno. No vengdayîş heme qadanê Newroze de berz bi.”
Dimayê qiseykerdişan bi sloganê “Bijî Serok Apo” adirê Newroze ame wekerdene û derûdorê adirî de govende ameye girewtene. Pîrozkerdiş bi deyîranê deyîrbaz Emerxan û Servet Bîrhatî dewam kerd.
