Qezaya Elkê ya Şirnexî de Newroze ameye pîrozkerdene. Parlameneterê Şirnexî yê DEM Partî pîrozkerdişî de qisey kerd û vat: “No adir do heta serkewtişî geş bo.”
Qezaya Elkê ya Şirnexî de bi sloganê “Newroza Azadî û Yewîya Demokratîke” Newroze ameye pîrozkerdene. Temsîlkarê partîyanê sîyasî û rêxistinê komelkî û xeylê kesî beşdarê pîrozkerdişî bîyê. Qadê pîrozkerdişî bi renganê kesk, sûr û zerdî û bi pankartan ameye xemilnayene. Welatijan serê sibayî bi cilanê xo yê neteweyî herikîyayê qadî û bi girewtişê govende dest bi pîrozkerdişî kerd. Pîrozkerdişî de welatijan sloganê “Bijî Serok Apo” vatêne.
‘Ma do Newroza bîne Rayber Apo reyede pîroz bikerê’
Pîrozkerdiş bi rêzgirewtişî dest pêkerd. Nameyê Komîteya Amadekar a Newroze ser o Dayîka Aştî Sîyajîn Cîn qisey kerd û Newroza şarî pîroz kerd. Hemserekê Şirnexî yê DEM Partî Ramazan Uysalî dîyar kerd ke na Newroze, Newroza yewîye û azadîye ya û nê çîyî vatê: “Şarê kurdî yew o. No mesaj bi rojan o Botan de qadanê Newroze de yeno dayene. Ma do Newroza 2027î Rayber Apo reyde pîroz bikerê.”
‘Do heta serkewtişî no adir geş bo’
Parlameneterê Şirnexî yê DEM Partî Mehmet Zekî Îrmezî dîyar kerd ke Botan de Newrozêka bi coşe ameya pîrozkerdene û wina qisey kerd: “Ma Newroza qehremanan pîroz kenê ke erdê ma yo pîroz Marînosî ra het Kato, Cûdî û Feraşînî pîrozêr kerdo. Newroze seba ma destanêk a, hîkayeya qehremanîye ya. No adir heta serkewtişî do geş bo. MA heta peynî wayîrê Prosesî Aştî û Komelê Demokratîkî vejîyenê. Ma Newroza Rayberê Şarê Kurdî Abdullah Ocalanî pîroz kenê.”
Adirê Newroze bi sloganê, “Bijî Newroz” ame wekerdene. Pîrozkerdiş bi deyîranê Koma Sîdar reyde girewtişê govende qedîya.
