Vaya petrolî roja îne de reste asta berza ke 3 serranê pêyênan de yeno rotene.
Çiqas eşkerayîyê Sereke Amerîka Donald Trumpî serê muzekereyan bibê zî zereyê bazirgananê petrolî rehet nêbeno û roj be roj vaya petrolî bena zêde.
Vaya petrolê Brent ê Deryaya Vakurî se ra 4,22 bîyo berz û yew varîl 112,57 dolar ra yeno rotene.
2022an ra (dima hêrişê Rûsya vera Ukrayna) nat vaya petrolî reste asta tewr corêne. Girêdayê naye vaya petrolê şenikî yê Teksasî zî se ra 5,46 vaşt ra û varîl bî 99,64 dolar.
Gama Trumpî ya ke seba akerdena Neqebê Hurmizî 10 rojî waxt dabî Îranî zî zereyê bazirgananê petrolî rehet nêkerd. Serekê Amerîkayî serê medyaya dîjîtale de eşkera kerd bî ke dayen û girevtena mabênê înan û Îranî de “Zaf rind vêrena ra.”
Reyna Trumpî vat ke ey ferman dayo ke hêrişê serê binawanîyanê enerjî yê Îranî heta 6ê Nîsanê bêro vindartnayene. Îranî heta nika vera nê vatişan eşkerayîyê nêda.
Heto bîn ra goreyê çimderanê dengizî di gemîyê petrolî yê şîrketa Çînî waşt ke Neqebê Hurmizî ra raverê hema ameyê açarnayene.
Çiqas ke Supaya Pasdaran verî vat bî ke Neqebê Hurmizî seba welatanê dostan akerdeyo zî na babete nîşan dana ke ameyen û şîyayena neqebî rehet nîya.
