Dewletê herême ke serekeyê dîplomatê înanê payeberzî seba ke şerê Rojhelatê Mîyanênî senî bêro vindarnayene ser o roja yewşeme Pakîstan de ameyê têhet, la Îsraîl û DYA vera Îranî hêrişanê xo dewam kenê. Îran zî herême de bi dron û fuzeyan cewab dano nê hêrişan.
Paytextê Pakîstan, Îslamabad de seba pêvînayîşan wezîrê karanê teberî yê Erebîstanê Seudî, Tirkîya û Misirî ameyê têhet. Serekwezîrê Pakîstanî Şehbaz Şerîf û Serekkomarê Îranî Mesud Pezeşkîyan reyde babeta neyarîya herême ser o “pêvînayîşê hîrayî” viraştê.
Şerê mîyanê DYA-Îsraîl û Îranî yew aşme pey xo de verdê û mîyanê na aşmede zêdeyê 3 hezaran kesî cuya xo kerde vîndî. Nê şerî de Îranî pê hêrişanê xo waşt ke dewletanê cîranan û kendawe yê dewletanê eraban zî biancê ortê nê şerî. DYA û Îsraîl tewrê pêvînayîşanê Îslamabadî nêbîyê.
Serekê parlamentoyê Îranî Muhamed Bakir Galibaf seba pêvînayîşan vat ke DYA’yî wexto ke îlawe yewîneyanê leşkerî şaweno Rojhelatê Mîyanênî bi nê pevînayîşan wazeno nîyetê xo binimno. Goreyê medyaya Îranî ra seba îşxalê bejayî Galibafî hîşyarî da û vat, “Îran seba ke yewîneyê leşkerî yê Amerîka û îtîfaqanê DYA’yî yê herême bierzê adir hedreyê.”
Îsraîlî da zanayene ke roja yewşeme pêlê hêrişêko newe hetê Îranî ra bêro do kerdene.
Heto bin ra zî her cayanê Tehranî de vengê teqayîşan ame hesnayene.
