Rixmê Peymana 29ê Çeleyî zî, koçberê Serêkanîyê rîyê hêrişanê grûbanê çeteyan û rewşa îşxalkerî ya Tirkîya ra nêeşkenê agêrê erdê xo ser. Şarî dîyar kerd ke ê wazenê bi hewayêko ewle agêrê warê xo, labelê Tirkîya û grûbê çeteyî ney rê benê asteng.
Rixmê Peymana 29ê Çeleyî zî agêrayîşê koçberanê Serêkanîyê nêyeno ca. Estbîyayîş û kerdişê çetayanê girêdayeyê Tirkîya û hukmatê demkî yê Sûrîye agêrayîşê koçberan asteng kenê.Welatîyê ke encamê zordarîya grûbanê çete û îşxalkerîya Tirkîya de koçber bîyê, wazenê ke herişkarîya çeteyan û îşxalekerîya Tirkîya biqedîya. Welatîyan rewşe û waştişê xo ajansê ANHA rê vatê.
‘Wazenê erdanê ma biroşê’
Mihemed Sîno ke nika Kampê Serêkanîyê de mîyane zehmetîyan de ciwîyeno, da zanayene ke keyeyê ey şaristanê Serêkanîyê de yo û çeteyan keyeyê ey kerdo xirabe û talan kerdo. Sîno wina vano: “Çend kesê ke ma nêşinasnenê, keyeyê ma de yê. Ma wazenê agêrê, labelê ê kesê ke keyeyanê ma de yê, verê vejîyayîşî her ca xirabe kenê. 300 donim erdê mi est o, çeteyan dest dabi ser û nika wazenê erdê mi biroşê. Tena ez nê, xeylê keyeyî nê halî de yê.”
‘Keyeyê ma rijnayî, malê ma talan kerd’
Feysel Mihemedî zî eşkera kerd ke keyeyê ey û birayanê ey bi temamî ameyê rijnayene. Mihemedî da zanayene ke sened û belgeyê erdê ey (dewe El Dibs de) destê ey de yê, labelê çeteyan dest dayo erdê ey ser û nika seba xo ramenê.
Ganî agêrayîş bi rûmet û ewle bo
Koçberê Serêkanîyê dîyar kenê ke di nê şert û mercan de agêrayîş mimkun nîyo. Ê wazenê ke bi hewayêko komkî (bi grûban), hêzanê Asayîşî reyde û bi rûmet agêrê warê xo. Waştişê koçberan no yo ke; wa îşxalkerî biqedîya û mal û milkê înan reyna teslîmê înan bêro kerdene.
