Girewteyê azadîye ke dimayê 30-31-32 serran zindan ra ameyî veradayene, tewrê turnuvaya futbolî ya “Rojê Festîvala Amara” bîyê. Gruba xoverdayoxanê zindanî yê ke ameyê veradayene serkewtîşî ra pey pîya fotograf ant û vat ma bi sloganê “30 serrî xoverdayîş” tewrê turnuva bîme.
Riha de vizêrî çarçewaya “Rojê Festîvala Amara” de turnuvaya futbolî ameye viraştene. Na turnuva bi munasebetê rojbîyayîşê 77. yê Rayberê Şarê Kurdî Abdullah Ocalanî bi sloganê “Rayberîya Azade Reyde Ver Bi Yewîya Demokratîke” ameye organîzekerdene. Vizêrî 4 taximî ameyî têver. Nînan ra yew ke bale ante xo ser, taximê xoverdayoxanê zîndanan bi ke dimayê 30 serran ameyê veradayene. Formayê înan ê kesk, sûr û zerdan zî bale ante xo ser.
Girewteyê azadîye yê ke 30, 31 û 32 serrî zindanan de xover dabi û nê 3-4 serranê pêyênan de amebî veradayene, teber de zî spor û aktîviteyanê sporî kenê. Girewteyê azadîye yê ke ameyê veradayene, serkewtişî ra dima sahaya futbolî de yew fotografo rengin û keyfweş girewt.
Taximê parlamenteran binkewt
Taximê girewteyanê azadîye yê ke ameyê veradayene û grûba parlamenteran kewtî têver. Kayî de taximê girewteyanê veradayan vera taximê parlamenteran 5-4 serkewt. Serkewtişê înan ê kayî sey xoverdayîşê înan ê zîndanî xo mojna.
Zindanan ra heta teber serkewtiş
Girewteyê zindanan ê ke ameyê veradayene kayê xo yê futbolî de zî mojna ke înan zîndan de aktîvîteyanê sporî ra fekveranêdayo û bedenê xo pêt girewto.
Taximê girewteyanê ke zindanan ra ameyê veradayene, formayê xusisî yê ke logoyê Amedsporî ser o est bi, dabi xo ra. Na yewe zî bale ante taximî ser o.
Nameyê girewteyanê ke zindan ra ameyê veradayene û tewrê na turnuva bîyê, wina yo:
Veysel Avci, Ahmet Kaganarslan, Mehmet Şîrîn Taşdemîr, Hanîfî Eser, Şehmuz Oz Subaşi, Alî Haydar Elyakut, Feyzî Ayzit, Tahîr Kizildemîr, Fuat Bor, Fuat Guler, Sînan Turkmen, Şîrîn Bozçali, Yaşar Kirmizi, Celal Araci.
