Serekê Pêroyî yê MHP’yî Devlet Bahçelîyî, seba ke Amedspor vejîya Lîgê Superî, Serekê Amedsporî Nahît Erenî rê mesajêk erşawit û o pîroz kerd.
Serekê Pêroyî yê MHP’yî Devlet Bahçelîyî bi munasebetê vejîyayîşê Lîgê Superî, Serekê Amedsporî Nahît Erenî rê mesajêke erşawit. Mesajê Devlet Bahçelîyî hetê Cagirê Serekê Pêroyî yê MHP’yî Îsmaîl Ozdemîrî ra ke Berpirsîyarê Çapemenî û Qadanê Dîjîtalan o, ame parekerdene.
Devlet Bahçelîyî mesajê xo de dîyar kerd ke ey serkewtişê Amedsporî ke serranê 1990î de ameyo ronayene, bi keyfweşî pêşwazî kerdo û wina vato: “No serkewtiş seba şaristanê Amedî û futbolê Tirkîya averşîyayîşêko pozîtîf o. Şaristanê Amedî ke hetê tarîx û kulturî ra şaristananê ma yê tewr zengînan ra yew o; hêvî kena ke dimayê nê serkewtişî, hetê kulturî, komelî û aborî ra zî averşîyayîşî virazîyê. Ez bawer kena ke vejîyayîşê Lîgê Superî yê taximê ma yê futbolî, do ciwananê ma zî teşwîqê sporî biko û do bibo sebeb ke ruhê futbolî yê yewbîyayîşî xurttêr bibo.
Bi nê hîsan ez bi can û zerrî bawer kena ke Amedspor do raywanîya Lîgê Superî de bi ruhê wayûbirayî û exlaqê sporî têbigêro û do paştî bido aramî, yewbîyayîş û piştgirîya Tirkîyaya ma. Ez bi nê hîsan şexsê şima de heme rayberanê biqîmetan ê Amedsporî, kaykeranê futbolî, xebatkaran û heme taxîmê Amedsporî pîroz kena. Ez hêvî kena ke serra futbolî ya 2026-2027î seba Amedsporî, Amedê ma û futbolê Tirkîya biba serrêka xeyr û weşe.”
