Şerê giran ê Amerîka-Îsraîlî yo ke vera Îranî her ke şino beno hîna giran, Îranî dardekerdiş, girewtiş û destbendkerdişî ra fek veranêdano.
Zextê rejîmê Îranî yê vera hemwelatîyan dewam kenê. Rixmo ke 39 rojî yo Amerîka û Îsraîl vera Îranî hêrişêko giran dabi destpêkerdene zî, Îran dardekerdiş, ceza, girewtiş û destbendkerdişan ra fek veranêdayo. Na çarçewa de yeno vatene ke girewteyo kurd rê cezaya dardekerdişî ameya dayene.
Goreyê Torra Heqanê Merdiman a Kurdîstanî, Mehkemaya Şorişî ya Mehabadî hemwelatîyo bi nameyê Muhsîn Îslamxa (20) yo ke şarê şaristanê Bokanî yê Rojhelatê Kurdîstanî yo, cezaya dardekerdişî daya ey.
Tora Heqanê Merdiman eşkera kerd ke cezaya dardekerdişî bi manayê “serewedaritişî” Muhsînî rê ameya dayene. Yeno vatene ke nêzdîyê di aşman Muhsîn hepsê Urmîye de ameyo îşkencekerdene û waşto ke zor bidê ey ke “sucê” xo îtîraf bikero. Goreyê agahîyan dimayê îşkenceyêko giran Muhsînî erşawito hepisxaneyê Bokanî.
Erjeno merdim vajo ke ke, serra 2022î de Muhsîn Îslamxa seba ke şaristanê Bokanî de beşdarê nûmayîşanê şorişê “Jin, Jiyan, Azadî” bîyo, hetê hêzanê îstîxbaratî yê Îranî ra amebi girewtene.
