Şerê Îsraîl-Amerîka û Îranî kewt roja xo ya 39. Her ke şino şer hîna hîra beno. Nê 39 rojan de Îran û grûbê ke girêdayeyê ey ê, bi dron û fuzeyan 684 reyî hêrişê Herêma Kurdîstanî kerd. Nê hêrişan de 16 kesî merdî û 95 kesî zî birîndar bîyî.
Goreyê eşkerayîya rayedar û şahidan, şewa bîne saetanê erey de bi 3 dronan hêrişê Hewlêrî ameyo kerdene. 2 dronî kewtî cayêko veng. Drona hîrêyîne zî dewa derûdorê dewa Zergezewî ya Ziraetî de kewte keyeyê hemwelatîyêk. Na hedîse de bi nameyê Musa Enwer Resûl û cinîya ey Mijde Eshed Hesen cuya xo ra bîyê. Musa pêşmerge bi û di domanê înan est bî.
Agahîyê 24 saetanê peyênan
Goreyê agahîyanê ajansê Rojnewsî, 24 saetanê peyênan de Herêma Kurdîstan de 19 reyî bi dronan hêrişî ameyî kerdene. 18 hêrişî serê Hewlêr û qezaya Koye de bîyî, hêrişêk zî serê qerargehêko leşkerî yê şaristanokê Çarqurne yê Ranya de bîyo.
Pêro pîya 684 hêrişî ameyî kerdene
Şerê 28ê sibata 2026î yo ke Amerîka-Îsraîlî vera Îranî dayo destpêkerdene û heta ewro; Îran û grûbê çekdarî yê Îraqî yê ke girêdayeyê ey ê, 684 reyî bi dron û fuzeyan hêrişê şaristan û qezayanê cîya-cîyayan ê Herêmanê Kurdîstan kerd.
Hêrişê bi fuze û dronan
Hewlêr de 544, Silêmanî de 112, Dihok de 25 û şaristanê Helebçe de zî 3 hêrişî bi dron û fuzeyan ameyê kerdene. Nê 39 rojan de bi temamî 16 welatîyanê Herêmê Kurdîstanî cuya xo ra bîyê û 95 kesî zî birîndar bîyî.
Hêrişî vera sîvîlan zî benê
Nê hêrişan de 7 pêşmerge û xebatkarêkê asayîşê teyaregehê Hewlêrî merdî. Reyna 6 pêşmergeyê partîyanê Rojhelatê Kurdîstanî zî ameyî kiştene. Sinorê Hewlêrî de 2 kesî, sinorê Silêmanî de 2 kesî û deşta Ninowa ya şaristanokê Başîk de zî 2 kesê bînî nê hêrişan de merdî.
Pêşmerge û hemwelatîyanê Kurdîstanî ra vete, 12ê Adare de qezaya Mexmûrî de hêrişê dronî de leşkerêkê fransizî zî cuya xo ra bi.
