Goreyê raporê Neteweyanê Yewbîyayeyan (NY), hîrê serranê peyênan de hezar û des xebatkarê hetkarîya merdimî ameyî kîştene.
Koordînatorê Karanê Merdimî yê NY’yî Tom Fletcherî pare kerd ke hîrê serranê peyênan de dinya de zafêrê hezar xebatkarê hetkarîya merdimî ameyî kiştene. Fletcherî vat ke “No zêdebîyayîş tesaduf nîyo, rîyê rîjîyayîşê mekanîzmaya pawitişî ra yo.”
‘Kiştişê xebatkaranê hetkarîye yê NY’yî 3 qat zêde bîyo’
Tom Fletcherî raporê xo de ke pêşkeşê Konseya Asayîşî ya NY’yî kerdo, eşkera kerd ke; tena serra 2025î de 21 welatan de tewr kêm 326 wezîfedarê hetkarîya merdimî ameyî kîştene. Ame vatene ke hîrê serranê peyênan de 1010 xebatkaranê hetkarîya dinyaya xo bedilnaye. Fletcher vano ke nê merdimê ke merdê, goreyê 3 serranê verê cû 3 qat zêde bîyê.
Goreyê eşkerayî, zafêrê nê kerdişan herêmanê şerî de qewimîyayê û tewr zaf zî Xeza û Şerîaya Rojava de merdimî ameyî kîştene. Reyna ame vatene ke Sudan, Başûrê Sudanî, Ukrayna û Komara Demokratîk ya Kongo de zî zaf xebatkarê hetkarî ameyê kiştene.
Zafaneyê hêrişan hetê dewletanê endamanê NY’ ameyê kerdene
Fletcherî pare kerd ke nê merdimanê ke dinyaya xo bedilnaya; wexto ke waşt awe, derman û hetkarîya sitargehî biresnê herêmanê hewcedar, ameyî qetilkerdene. Sewbîna Fletcherî vat ke; nê merdimî serê konvoyanê hetkarî de ke nîşanê înan eşkere bîyê û wextê koordînasyonê wezîfedarî ameyî kiştene. Eşkerayî de ame vatene ke zafê nê dewletanê ke hêriş kerdo, endamê NY’yî yê.
Fletcher: Rîyê bêpîvanîya şerî ra yenê kiştene
Fletcherî îfade kerd ke wezîfeya xebatkaranê hetkarîye bi xo tehlukeyin a, merdimî seba bêbaldarîye, rîyê bêpîvanyîya terefanê şerî ra ameyî kîştene. Fletcherî da zanayene ku huqûqê merdimî yê mîyanneteweyî û qerarê Konseya Asayîşî ya NY’yî yê serê pawitişê xebatkaranê hetkarîye, pratîk de nêyenê bicatardene.
‘No hêriş vera hêvîya cuya bi mîlyonan merdiman o’
Eşkeraye de ame vatene ke karê hetkarîya merdimî zaf herêman de yenê astengkerdene; no rewş zî beno sebeb ke hetkarî bêrê birnayene, klînîkî bêrê girewtiş û hewcedarîyê bingeyînî nêrê peydakerdene. Fletcherî dîyar kerd ke hêrişê vera xebatkaranê hetkarîye tena vera şexsan nîyê, eynî wextî de vera hêvîya cuya bi mîlyonan merdiman o.
Tewr peyên Fletcherî vengdayîşê Konseya Asayîşî ya NY’yî kerd û waşt ke seba pawitişê xebatkaranê hetkarîye qeraranê xo bîyarê ca.
