Konseya Ewlekarî ya Neteweyanê Yewbîyayeyan rewşa Sûriye ser o kombîyayîşê xo yê aşmane viraşt. Kombîyayîş de fikarê derheqê qelsîya prosesî, lazimtîyê merdimî û rîskê mudaxaleyî yê teberî ameyî qisseykerdene.
Konseya Ewlekarî roja çarşeme seba erjnayîşê rewşa Sûrîye ronişt. Hetkarê Temsîlkarê Taybet ê Sûrîye Claudio Cordone endamanê konseyî rê qisey kerd û vat: “Her çend ke adirbestê mabênê DYA û Îranî de krîzê herêmî biney kêm kerdbo zî, rewşa zereyî ya Sûrîye hema zî bi tehluke ya û dîyar nîya.”
Cordone dîyar kerd ke têgêrayîşê leşkerî yê hêzanê teberî û binpaykerdişê sînoranê Sûrîye, aramî fînenê tehluke û averşîyayîşanê sîyasî û aborî kenê zehmet. Cordone bal ant têgêrayîşan leşkerî yê hêzanê ciran ser o û ê bi binpêaykerdişê xetanê adirbestî sucdar kerdî û vat: “Nê operasyonê provokatîfî bandureyê Sûrîye û xebatê awankerdişê aştî herimnenê.”
Vengdayîşê hetkarîya merdimî
Kombîyayîşî de endamanê konseyî piştgirî daye xebatanê merdimî û dîyar kerd ke ganî sivîlî bêrê pawitene. Heyetan bal ant muhîmîya fonanê hetkarî ser o û vat ke bi mîlyonan merdimî koçber bîyê, problemê werdî dewam keno û binawanîya welatî rijîyayo. Temsîlkarê Brîtanya zî diyar kerd ke seba başbîyayîşê aborî û aramîya domdare, lazimtî bi piştgirîya mîyanneteweyî est a.
Sûrîye waşt ke hêrişê teberî vindê
Temsîlkarîya Sûrîye ya Neteweyanê Yewbîyayeyan zî veng da KENY’yî ke seba vindarnayîşê binpaykerdişê yewîya herra Sûrîye û hêrişanê hêzanê xerîban bi lez hereket bikerê. Endamanê bînî yê konseyî zî bal ant muhîmîya prosesêkê yê hîrayî, pawitişê heqanê merdiman û resnayîşê hetkarîya merdimî.
‘Şerê herême eşkeno destkewteyan biherimno’
Zaf endaman hişyarî daye ke şerêko newe yê herêmî eşkeno Sûrîye hîna zaf bêîstîkrar bikero û serkewtişê prosesê vîyartişî orte ra wedaro.
