Amedspor rayîrê şampîyonî de destekêko gird şarî ra gêno. hetgirê ke xeylê şaristananê Kurdîstanî û Tirkîya de seba maçî ameyê Amed, hetgiran dîyar kerd ke serkewtişê Amedsporî tena serkewtişê taximêke nîyo, eynî wextî de serkewtişê îradeyê şarî yo.
Stadyumê Amedî bî şahidê heyecanê des hezaran. Hetgirê ke seba maçî muhîmî yê Amedsporî ameybî têhet, waştena xo ya seba vejîyayîşê Super Lîgî bi vêngêko berz ard ziwan. Mîyanê girseya ke nêzdîyê 35 hezar kesî ke bîyê, Mîdyat ra heta Antalya, Êlih ra heta xeylê şaristananê binan welatijî bîbî.
‘No taximê zerrîya ma yo’
Hamza Komlekçî bale ante serê qelebalixê şaristanî û vat: “Roja maçê Amedsporî xeylê şaristanan ra kesî yenê îta. Ganî Amedspor nê maçî bigîro û bibo şampîyon. 35 hezar kesî seba serkewtişî ameyê maçî; ganî Amedspor seba hetgiranê xo vejîyo Super Lîg.”
‘Ma do nameyê xo berz bikerê’
Seyît Yakut zî da zanayene ke ey tu wext taximê xo tena nêverdenê û wina vat: “Ma heme şar hetgirê Amedsporî yê. Ma taximê pêgênê û veranêdanê. Serkewtişê ey serkewtişê ma yo. Înşelah ma do nameyê ey berz bikerê.”
Antalya ra heta Batman paştîdayene
Yew pêgiro ke dûrî ra ameyo, Derman Kahraman o. Kahraman hîsê xo wina ardî ziwan: “Ez seba serkewtişê Amedsporî Antalya ra ameya. Ma hetgirê nê taximî yê û ma serkewtişê heme taximanê kurdî û Kurdîstanî wazenê.”
‘Moralê şarê ma berz keno’
Şaristanê Êlihî ra xeylê kesî seba Amedsporî waran de bî. Adnan Tekeş dîyar kerd ke serkewtişê taximanê herême moralê şarî berz keno û vat: “Batmanspor vejîya lîgê 1. Înşela Amedspor zî vejîyo Super Lîg. No serkewtiş seba welatê ma û şarê ma muhîm o.”Ahmet Gultekîn zî eynî waştişî tekrar kerdî û dîyar kerd ke ey Êlih ra seba serkewtişê Amedsporî ameyê.
‘Ma wazenê vajê ma zî est ê’
Mîyanê hetgiran de cinî û ciwanî zî bi hawayêko çalak ca gênê. Hetgirê ke nameyê xo Nur Mîna Porsuk bale ante serê serkewtişê Amedsporî û wina dewan kerd: “Ma seba serkewtişê taximê xo çi destê ma ra bêro ma kenê. Hedefê ma emser Superlîg o.”
‘Seba ma zî bêrê dîyene’
Arzu Aflatun zî seba serkewtişê Amedsporî waştena xo wina ard ziwan: “Amedspor can û zerrîya ma ya. Ma wazenê taximê ma bihêz bibo û vejîyo asta tewr berze.” Evîn Akgul bale ante serê îradeyê estbîyayîşî û wina vat: “Ma wazenê Amedspor serbikewo ke ma zî bêrê asene û vajê ma zî est ê.”
‘Serkewtişê Amedsporî ‘serewedaritişê şarî yo’
Adem Aslan ke Midyat ra ameyo wina bale ante serê nasnameyê taximî: Serkewtişê Amedsporî, serkewtişê heme şarê ma yo. No taxîmê heme kurdan o.” Sûreyya Ezel bale ante serê muhîmîyê komelî yê nê serkewtişî û vat: “Nêzdîyê 35 kesî îtayê. Çimê heme şarî serê Amedî de yê. Ma hêvî kenê no serkewtiş bibo sey serewedaritişêk/moralêke seba şarê ma.”
Ersîn Rençber zî bawerîya xo yê taximî wina ard ziwan: “Ma taximê xo ra bawer ê. Ma wazenê Amedspor Superlîg de vera taximanê Tirkîya kaybikero. Ma her wext pey taximê xo yê.”
