Prof. Neşe Ozgen ard ziwan ke Erdogan bi hêrişan keno ke prosesê dîyalogan kontrol bikero la seba ke qels bîyo hêzê ey nêmendo ke bieşko bazarîye bikero.
Endamanê Forumê Haştîye û Azadîye yê Ewropa ra Akademîsyena Haştîye Prof. Neşe Ozgen ANFyî rê qalê hêrişan û prosesê dîyalogan kerd.
Neşe Ozgen îfade kerd ke Tirkîya de wextêkê dergî ra nata çeteyêka menfaetan serkêşîya Erdoganî de pergalê dewlete visto binê hukmê xo û kapîtalîzmê qezençî awan kerdo. Neşe vat: ”Erdogan hinî wina bîyo ke nêeşkeno Tirkîya îdare bikero. A raşte berardişê çekan de qasê propagandayan averşîyayîşêk çin o. Şarê kurdî û hêzanê demokrasîyî bi xoverdayîşê xo Erdogan qels kerdo. Kurdî hema zî herême de aktorê tewr xurt ê ke do bieşkê qederê xo bi hêzê xo dîyar bikerê.”
Prof. Neşe Ozgen bale ante pêvînayîş û qiseyanê prosesî ser û vat: ”Oyo girîng no yo ke ma do se bikerê. Ganî hêzê demokrasîyî cade bernameyê xo dîyar bikerê. Hêvî xora est a. La asa çareserîye de averşîyayîşêk çin o.”
Neşe Ozgen hêrişê nikayênî ercnayî û vat: ”Prosesê dîyalofan de hem vera gerîlayan hem zî vera şarî hêrişî yenê kerdene. Hêrişî nêvindertî la Erdogan zî qels o. Erdogan xîret keno ke îqtîdarê xo rijîyayîşî ra bixelisno û nêro muhakemekerdene. Erdogan bi hêrişan keno ke prosesê dîyalogan kontrol bikero la seba ke qels bîyo hêzê ey nêmendo ke bieşko bazarîye bikero.”
Prof. Neşe Ozgen da zanayene ke çareserîyêka haştîyane do hema Tirkîya hem zî herême aram bikera û vat: ”Rojawan hem bi modelê xo hem zî bi taybetmendîya xo seba ma hêvîyêka newî ya. Seserra 21ine de modelêkê azadîye yo newe yo winayên ame afernayene ke seba merdimatîye yo. Sey hêzanê aştî û demokrasîyî seba pawitişê Rojawanî destê ma ra çi bêro ma do bikerê.”
