Nuştox Vahyeddîn Sari nê 28 serrê ke wazîyeno bêro çinkerdiş la Sari bi hembarîya hukmatê Sidiq Efendî, Zuhtu Guven, Ahmet Dervîşî Qirkerdişê Zîlanî roşn keno.
Kitabê bi nameyê “Qirkerdişê Zîlanî: Mi Bişuyê û Dima zî Defîn Bikê- Zilan Katliamı: Beni Yıkayın Sonra Gömün” Vahyeddîn Sari Weşanxaneyê Aramî ra vejîya. Nuştox bi çimeyê desan nuştox, belge û şahîdan no kitab hadre kerd. Kitab xususî Qirkerdişê Zîlanî senî ameyo plankerdiş û armancê qirkerdişî ser o vindeno.
Goreyê xebera MA’yî Vahyeddîn Sari, hepisxane de bi îmkanê zehmetî no kitab nuşto, kitab kategorîya tarîxî de ame weşankerdiş. Kitab 4 beşî ra virazîyayo, beşa yewin behsa têkilîya kurd û tirk, mabenê serrê 1919 û 1922î kena. Beşa diyine zî pêvajoya înkar û îmhayî, beşa hîrêyine zî Serewedartişê Agirî û beşa peynî de zî behsa hadreyîya Qirkerdişê Zîlanî yena kerdiş.
Qirkerdişo tewro gird
Sari bi kitabê xo rojê wehşetî yê Qirkerdişê Zîlanî bi raştî vatişê şahîdan resneno wendoxan xo rê. No vatiş de “Qirkerdişê Dêrsimî sey hadreyîya Qirkerdişê Zîlanî bî, wehşetîya Zîndanê Amedî zî xogêrayişê şarê kurd bî” heqîqat xo nîşan dano. Sari nê 28 serrê ke wazîyeno bêro çinkerdiş la Sari, bi hembarîya Sidiq Efendî, Zuhtu Guven, Ahmet Dervîşî zî Qirkerdişê Zîlanî roşn keno.
Vahyeddîn Sari kam o?
Wan de serra 1971î de ame dinya, perwerdeyê xo Wan de temam kerd. Zanîngehê Gazî de zî beşa raya pêroyî wend, peynî têkoşînê azadîye beşdar bî. Serra 1997î de Wan de ame girewtiş û cezaya muebbetî girewt. Nika Hepisxaneyê Sîncanî de maneno.
